Awe ta trata e ley di Ombudsman den parlamento y e lo ta un logro hopi grandi. Presidente di Parlamento mes Edgar Vrolijk ta e persona cu a trek e ley aki y ahusta loke mester ahusta pa Aruba tin su Ombudsman.
Segun parlamentario Hendrik Tevreden tin un comision cu ta trek e ley di Ombudsman, pero presidente di parlamento a pone como un meta pa trek e ley aki mas hopi cu ta posibel y awe ta mira a bin cu su logro.
Sinembargo parlamentario Hendrik Tevreden ta lamenta cu no ta e totalidad di parlamentarionan a para tras di e ley di Ombudsman , pero tin un diferencia di opinion si ta 11 hende por instala un Ombudsman si of no. Oposicion cu ta consisti di Accion 21, MAS,algun di AVP no tur a vota contra pa Aruba haya su Ombudsman.
Pa parlamentario Hendrick Tevreden esaki ta un lastima unda cu ta mira cu e importancia di un Ombudsman pa e controlnan cu e ta bay hiba di e casonan cu e por presenta riba maneho di gobierno , pero tambe e rol cu e Ombudsman ta bay tin pa ta e defensor di comunidad. Na momento cu Aruba tin su Ombudsman un ciudadano por yega e Ombudsman y entrega un keho di un situacion cu ta canando robes den un Pais of contra di Gobierno.
Asina cu esaki sosode e Ombudsman lo traha su caso y atende cu e situacion y presenta e situacion pa e ciudadano. Segun parlamentario Hendrik Tevreden e importancia pa un Ombudsman ta esencial den un comunidad.
Lamentablemente Aruba na e momentonan aki ta e ultomo Pais den region pa yega na un Ombudsman, pero tambe importante pa bisa cu den tur e tematica di abuso di mucha cu ta bin ta atendiendo for di 2018 unda cu a instala e crisis plan, percurando pa tin dokter forensico , instalando tur e cadenanan na trainingnan na tur e trahadonan por bisa cu Ombudsman ta e cherry riba e bolo pa locual ta e casonan di abuso.
Tambe mester bisa cu bou di e Ombudsman ta bay tin un kinderombudsman cu ta significa cu e casonan di abuso di mucha directamente por bay cerca e kinderombudsman pa haya ayudo pa trata e caso y presenta un caso waterdicht den corte. Tur e partinan aki ta beneficionan cu un Ombudsman por trece pa Aruba y lamentablemente oposicion a vota contra lagando un banda e importancia y esencia di un ley di ombudsman dies pa ta contra di presidente di parlamento y of cu no ta nan ta bin y haci e logro aki posibel pa Pais Aruba. Tipo di politiconan partidista asina mester stop na Aruba y mester cuminsa mira Pais Aruba na prome luga.
Pa fraccion di MEP e ley di obudsman ta un logro hopi grandi y e ta un satisfaccion hopi profundo y ta spera cu awe diabierna 28 juni 2024 lo keda presenta den parlamento. Sigur e trabou aki no ta parlamento so a hacie pero HOF a haci su trabou sr. De Kort, Raad van Advies y ARA cu ta personanan imparcial y cu no ta politico hunto cu e cuartiermaker a scoge candidatonan y nan mes a haci e screening y nan ta presenta tres candidato na parlamento pa parlamento por scoge y vota pa un cantidato cu lo bira Ombudsman pa Pais Aruba.
