Awe 7 di februari 2022 ta cumpli e bunita edad di 75 aña nos lider honorario sr. Nelson Orlando Oduber, kende tabatin un trayectoria impresionante den politica Arubano y alabes a sa di trece logronan grandi pa pais Aruba, tanto den funcion di diputado como Prome Minister.
Prome stap den politica
Nel manera e ta wordo yama cariñosamente a sigui su estudionan di Gemeente administratie y Sciencia Constitucional na Hulanda, a regresa su isla natal y tabata yuda partido MEP den tur e preparacionnan riba tereno di structura estatal.
Nel a wordo acerca pa promer vez na 1975 pa subi lista di MEP. Asina pues cu dia 25 di april 1975 como candidato no. 23 riba lista di MEP el a dal su promer stap den politica y den su promer salida el a haya sosten considerabel di e pueblo votador.
Logronan di Nel como diputado
Na 1975 Nel a bira Diputado di Teritorio Insular di Aruba y esaki pa tres periodo consecutivo te cu 1985. Como diputado el a ehecuta proyectonan grandi pa nos pueblo, manera nos himno, bandera, ortografia, referendum, a funda IDEFRE y Instituto di Cultura, a funda Arubus, Aruba Ports Authority, proyecto di containerhaven, fondo di pensioen pa e trahadornan di haf, edificionan di Biblioteca Nacional y Domeinbeheer, Hotelvakschool Bushiri, oficinanan auxiliar di gobierno, etc.
Tambe Nel tabata miembro di Eilandsraad, Miembro di Comision di Reino, Vice Presidente di RCOA, Coordinador di nos Status Aparte y responsabel pa e introduccion di nos propio Banco Central, nos propio florin Arubano, Constitucion di Aruba etc. Sin duda cu Nelson Oduber tabata instrumental den e logro di nos Status Aparte caminda el a lucha schouder cu schouder cu Betico Croes pa realisa e libertad di nos pueblo entrante 1 di januari 1986.
Logronan di Nel como lider di MEP
Desde 31 di december 1985 Nel a bira lider interino di MEP y dia 8 di maart 1987 el a ser eligi como lider di nos partido y re-eligi na 1991, 1995, 2000 y 2005. Den e eleccion di 1989, Nel a percura pa MEP obtene 10 asiento na 1989. Den e eleccionnan na 1993, 1994, 1997, 2001 y 2005 MEP bao liderazgo di Nel nunca a baha bao di 9 asiento, locual ta un logro hopi grandi pasobra tur partido na Antias y Aruba di cual nan lider fundador a fayece a bay atras den voto y hopi di nan practicamente a caba na nada.
Den e eleccion di dia 28 di september 2001 Nel a pone 4 logro historico riba su nomber, esta Nel a sali vote getter, Nel a guia MEP na un victoria aplastante di 12 asiento, MEP tabata e prome partido den Reino cu a saca mayoria absoluto den un eleccion como pais y Nel tabata e candidato cu mas voto na un urna electoral, esta na Colegio Laura Wernet Paskel. Nel a ripiti e hazaña aki den e eleccion di 2005 caminda MEP a logra un mayoria absoluto di 11 asiento. Durante 25 aña (1986-2011) Nel a guia nos partido exitosamente como lider di MEP.
Logronan di Nel como Minister Presidente.
Como Minister Presidente durante 4 periodo Nel a percura pa logronan grandi pa Aruba: A firma cu Coastal Refinery pa reapertura di e refineria; A saca e fecha 1996 di independencia for di den Statuut, unda nos ta mantene e derecho pa bira independiente dia nos ta desea esaki; A firma un TIEA cu Minister di Finansas John Snow di Merca; A firma cu SACE un acuerdo, unda a trece un solucion pa e problema di garantianan hotelero: Un debe di 206 miyon dollar a ser reduci te na 110 miyon dollar; A firma contract pa compra di ELMAR; A independisa e companianan estatal y converti nan den N.V., esta WEB, Setar y Elmar; A firma cu e Secretario di Homeland Security, Michael Chertoff e acuerdo di Customs Pre Clearance pa avionnan priva; A firma cu Secretario di Estado, Ank Bijleveld, e acuerdo di 250 miyon florin di Plant N.V. cual suma ta pertenece na Aruba; A percura pa e prome hotel di 5 strea na Aruba, esta Ritz Carlton; A percura pa e unico parke di Molina di biento na Vader Piet y asina e tabatin un sin fin mas di proyectonan na beneficio di pueblo.
Honestidad y integridad
Nel Oduber semper a resalta como un persona honesto y integro. Un gobernante cu ningun hende por punta dede riba dje. Nel ta un tata di famia ehemplar cu ta stima su famia y particularmente su casa y su 3 yiunan. Awe su yiu homber Dangui a sigui e pasonan di su tata den politica.
Alabes 19 di augustus 2019 a marca un dia historico pa Aruba ora gobierno a haci cambio di e nomber “Sasakiweg” pa “Avenida Nelson Orlando Oduber”.
Awe riba dia di su 75 cumpleaños e famia grandi di MEP ta desea nos lider honorario hopi aña mas di bida, yen di salud y bendicion. MEP ta orguyoso di tabatin un lider asina grandi y kende a trece asina tanto logronan grandi pa nos pais y pa cual nos ta eternamente gradicido. Pabien Nel!
