Como parti di esfuerso continuo pa fortalece e sistema di maneho di
desperdicio y transiciona pa un economia circular, Baki den Bario ta
regresa na Barcadera pa dos dia di colleccion: 8 di maart y 5 di april 2025.
Prepara bo desperdicio di antemano y separa nan pa por facilita e proceso
di colleccion. Tipo di desperdicio cu ta wordo ricibi separa: Metal, e-waste,
carton, green waste(yerbe. mata), desperdicio di construccion, taira, azeta
di cushina uza, bulk waste. Pa mas informacion por bishita limpi.aw .
Baki den Bario Barcadera lo ta tumando luga di 7’or pa 11’or di mainta y
dependiendo e trafico lo tin posibilidad pa pone un extra ora. E tereno cu lo
wordo uza ta riba e caminda di Barcadera, net prome cu yega Arugas.
Gobierno ta continuacion, e esfuerso pa crea un maneho di desperdicio
robusto ta sigui. E meta ta un Aruba mas limpi, mas sostenibel y mas
responsabel. “Nos tin cu sigui traha hunto pa crea un Aruba cu nos por ta
orguyoso di biba ariba. Separacion di desperdicio ta unda nos tin cu sigui
pone nos esfuersonan como Pais. Un sistema cu ta pone hende, planeta y
prosperidad den centro di maneho di desperdicio,” Minister Arends ta
enfatisa.
Actualmente tin un estudio andando door di University of Georgia, Impact
Blue Foundation y Gobierno di Aruba. E meta di e estudio aki ta pa siña
mas tocante e uzo di plastic den nos comunidad. E Protocol di Evaluacion
di Circularidad (Circular Assessment Protocol /CAP) ta duna un impresion
di e circularidad di un isla y ta provee data pa por tuma decisionnan
informa pa reduci sushi di caya (por ehempel, plastic di un solo uzo) den
medio ambiente y pa por aumenta e circularidad di material den maneho
di desperdicio.
Minister Arends ta expresa su gratitud na tur partnernan cu ta sigui
contribui pa un Aruba limpi limpi.