E bakuna nobo kontra corona di Novavax sin mRNA ta disponibel na Boneiru. Esaki e departamento di Salubridat Públiko ta informá. Bakuna ku mRNA tin bòl chikitu di vèt den dje ku e kódigo di e vírùs di corona, e bakuna nobo no tin e bòlnan chikitu akí. Novavax ta destiná pa siudadanonan ku no a pasa e angua kontra corona promé, komo ku por ehèmpel nan ta alérgiko pa mRNA. E bakuna nobo ta destiná tambe pa hendenan ku no ke bakuna ku mRNA aden. Na Boneiru tur hende ku tabata ke esaki a pasa e anguanan kontra corona di Pfizer ku mRNA.
E bakuna di Novavax ta hasi uso di un proteina ku ta haña tambe den e vírùs di corona. Den e bakuna tin parti hopi chikitu di e proteina akí, a reprodusí nan den un laboratorio. Tin tambe den dje un supstansia ku ta fortifiká resistensia di kurpa kontra e proteina. Despues ku un hende pasa e angua, su kurpa ta traha antikuerpo kontra e proteina akí di e vírùs di corona. Si despues e kurpa bin den kontakto ku e vírùs di corona, e antikuerponan akí ta drenta den akshon rápidamente.
Hendenan di 12 aña òf mas por pasa e angua ku Novavax. Pa un bon protekshon kontra corona mester pasa dos angua ku e bakuna akí. Despues di e promé angua ta dura tres siman promé ku un persona por pasa e di dos angua. Tin tambe un angua di buster di Novavax disponibel. Un persona por pasa e angua di buster akí tres luna despues di e promé dos anguanan.
Siudadanonan ku ke esei, por pasa e angua ku sita na e departamento di Salubridat Públiko, Kaya Gilberto F Croes 24. Pa un sita nan por yama e number grátis 0800 0800. E number akí ta pa hendenan tambe ku tin pregunta tokante e bakuna nobo. Personanan ku ta duda si e bakuna nobo ta algu pa nan, por konsultá ku nan dòkter di kas.