Den un paso importantísimo pa promové hustisia sosial, inklushon i empoderashon di gruponan vulnerabel, tres organisashon klave riba Boneiru ta marka un etapa nobo den defensa di derechonan humano na nos isla.
Bonaire Human Rights Organization (BHRO), Muhernan Fuerte Bonaire – Ala Femenino di Pueblo Progresivo Uni (MF–PPU), i Nos Ta Futuro di Boneiru – Ala Hubenil di Pueblo Progresivo Uni (NFB–PPU) a formalisá un relashon di koperashon pa fortifiká edukashon síviko i partisipashon aktivo den komunidat ku fokus riba derechonan humano.
Un MOU di koperashon pa kambio real ku enfoke riba tres elemento esensial: edukashon, mobilisashon, i konsenshi siviko riba derecho humano. BHRO lo duna sosten edukativo i fasilitá tayernan di derecho humano pa miembronan di Muhernan Fuerte i Nos ta Futuro di Boneiru. Den kuadro di e kampaña “Nos Tambe Tin Derecho”, E organisashonan lo organisá:Tayernan di derecho humano, Seshonan pa papia den públiko, Nochinan di pelíkula edukativo, Aktividatnan di dia di famia, Programanan Edukativo pa Komunidat i mas.
Davika Bissessar presidente di Bonaire Human Rights a deklara: “BHRO ta asumi liderato den suministrashon di material edukativo, guia profeshonal i fasilitashon di tayer. Muhernan Fuerte ta soru pa e forsa I bos di muhernan, mobilisá komunidat i duna sosten organisativo. Nos ta Futuro di Boneiru ta lanta e bandera di hubentut, representando nan bos, aktivá partisipashon hubenil i trahando materialnan edukativo adaptá pa nan generashon.”
Phenice Frans-Piar, Kordinadó di Edukashon di Muhernan Fuerte, a anjadi: “Nos ta ansioso pa kuminsá eduká nos muchanan na Boneiru tokante nan derecho den e kampaña di derecho humano ‘Nos Tambe Tin Derecho’.”
E koperashon aki ta un lucha uni kontra inhustisia. “Nos ta manda un mensahe kla ku e lucha pa derechonan humano no tin edat, no tin genero, i no tin limitashon. Nos mester uní, pone mannan huntu pa pone fin na desigualdat, esklushon i desinformashon,” segun James Finies lider di Pueblo Progresivo Uni.
Boneiru ta logra un kuadro nobo di koperashon inklusivo ku ta pone den praktika e prinsipionan di dignidat, hustisia i partisipashon aktivo. Un Boneiru mas fuerte ta nifiká un Boneiru ku tur su hendenan sa nan derecho I tin un voz.
