Biblioteca Nacional Aruba ta invita tur muchanan, hunto cu nan mayornan, pa participa den un actividad cultural completamente gratis cu lo tuma luga dia luna awo pa 5:30 di atardi.
Comision di actividad di e institucion a anuncia algun cambionan chikito den orario di su programanan. Prome, e actividadnan tabata tuma luga pa 3:00 di atardi, pero for di awor nan lo cuminsa oficialmente pa 5:30 di atardi. Tur actividad nobo lo sigui e orario nobo aki.
Durante e evento di dialuna, e muchanan presente lo por disfruta di diferente actividad recreativo y educativo. Lo tin weganan interactivo y tambe un presentacion special di Madelin hunto cu su grupo cultural, cu lo demostra bailenan tradicional di Aruba adapta pa mucha chikito. E meta ta pa familiarisa e generacion hoben cu e bailenan y expresionnan cultural cu ta forma parti di e patrimonio Arubiano.
Conocemento di cancionnan y bailenan local no ta wordo integra mes manera antes den curiculo escolar. Esaki por tin un impacto riba e desaroyo cultural di e muchanan y nan entendemento di nan propio identidad. Pa e motibo ey, e institucion ta sigui haci esfuerso pa organisa actividadnan cu ta enfoca riba cultura y raiz Arubiano.
Biblioteca Nacional ta recalca cu e actividad ta habri pa tur mucha y nan famia, y ta representa un oportunidad pa pasa un rato ameno mientras cu nan ta siña mas tocante e identidad y tradicionnan di Aruba.
Entrada ta liber y interesadonan por presenta nan mes dia luna awo pa 5:30 di atardi na Biblioteca Nacional Aruba.