E medidanan di corona ta keda na vigor en todo kaso un siman mas. Asina gezaghèber Edison Rijna a deklará. ,,Di un banda e infekshonnan ta sigui baha.
Lo bo pensa e ora ei ku e medidanan por bira mas suave. Pero di otro banda e kantidat di infekshon ta haltu ainda pa Boneiru, i tin tres hende den hòspital. E preshon riba kuido ta grandi. Pa e motibu ei mi a disidí ku por lo pronto e medidanan ta keda meskos. Si e kantidat di infekshon sigui baha e siman aki i e siguiente siman, podisé nos por suavisá e medidanan. Pero esei nos tin ku warda pa mira ainda,” asina gezaghèber a deklará.
Rijna a deklará tambe ku e ta sigui e situashon na Aruba di aserka. ,,Manera ta konosí, na Aruba tin sinku kaso di e vírùs di corona britániko kambiá. Despues di konsulta ku Salubridat Públiko, a disidí di konsehá biaheronan pa biaha solamente pa asuntunan urgente pa Aruba. Nos no sa kon e situashon lo desaroyá su mes na e isla ruman. P’esei nos mester ta kouteloso.”
Na Entidat Públiko Boneiru a drenta último dianan hopi pregunta tokante e tèst antígeno. E tèst antígeno ta un tèst rápido. E ta laga mira si tin proteina di vírùs den e sleim den nanishi òf garganta di un hende. Tin ku hasi e tèst antígeno kuater ora promé ku salida. E tèst rápido akí, e tèst di PCR, i e deklarashon di salú di Salubridat Públiko, ta obligatorio awor pa biaheronan for di paisnan di riesgo haltu.
E paisnan di riesgo haltu ta entre otro Merka, Canada, Repúblika Dominikano i tur pasahero for di Suramérika. Probablemente for di 10 di febrüari, biaheronan for di Hulanda ku ta bin Boneiru ta obligá pa hasi e tèst di PCR i e tèst antígeno promé ku salida. Tambe nan tin ku yena promé ku salida e deklarashon di salú di Salubridat Públiko na www.bonairepublichealth.org.
Biaha pa Aruba solamente pa asuntunan urgente
