Tourism Corporation Bonaire (TCB) a kompartí
datonan preliminar pa luna di òktober 2024, for di kua ta resultá ku den e luna ei Boneiru
a risibí 14.406 bishitante stayover. Esaki ta un oumento di 6,6% kompará ku luna di
òktober 2023, ora ku 13.520 turista a bishitá nos isla. E sifra akí ta surpasá tambe e
kantidat di bishitante di promé ku e pandemia den luna di òktober 2019, kaminda nan a
registrá 12.200 bishitante.
Regata di Boneiru a sòru pa un oumento konsiderabel di e kantidat di bishitante den luna
di òktober, spesialmente pa motibu di a atraé hopi bishitante di nos islanan besiña. Den
luna di òktober 2023 Boneiru a risibí 2699 bishitante for di Kòrsou i 372 bishitante for di
Aruba pa e evento akí. E aña aki e kantidatnan akí a subi ku respektivamente 10,8% i
66,7%, ku 2992 bishitante for di Kòrsou i 620 bishitante for di Aruba, loke ta proba e forsa
di atrakshon kresiente ku e festival akí tin den nos region.
E bishitantenan hulandes a keda e segmento mas grandi, ku un total di 6719 loke ta
representá 46,6% di e kantidat total di bishitante. Kòrsou a sigui ku 2992 bishitante
(20,8%) i for di Merka a bin 2229 bishitante (15,5%). Remarkabel ta ku e kantidat di
bishitante for di Aruba a bira kasi dòbel kompará ku luna di òktober 2023, esta di 372 pa
620 na aña 2024. E bishitantenan for di Alemania, Bélgika, Canada, Suisa i Brasil tambe
a sòru pa un aporte importante na e total.
Di e bishitantenan merikano, mayoria a bini for di estadonan manera Florida, California,
Texas, Georgia, Virginia, North Carolina, Colorado, Pennsylvania i New York. E gruponan
di edat dominante serka bishitantenan merikano, tabata esun di 55 pa 64 aña (27,5%) i
esun di 65 aña bai ariba (22,6%), loke ta aksentuá e forsa fuerte di atrakshon ku Boneiru
tin pa biaheronan di edat mas haltu. E bishitantenan hulandes a bini prinsipalmente for
di Noord-Holland, Zuid-Holland i Noord-Brabant, ku komo gruponan di edat di mas
importante esun di 55 pa 65 aña (20,5%) i esun di 45 pa 54 aña (19,0%).
Pa loke ta trata bishitante krusero, den luna di yüni 2024 Boneiru a risibí 25.216 bishitante
(riba 6 barku krusero), den luna di yüli 23.785 bishitante (riba 6 barku krusero), den luna di
ougùstùs 30.261 bishitante (riba 7 barku krusero) i den luna di sèptèmber 19.288
bishitante (riba 5 barku krusero).
Boneiru a yama bon biní na 14.406 bishitante stayover den luna di òktober 2024
