Boneiru ta destaká eksperensianan di nos isla na Toronto Outdoor Adventure Show

Ku orguyo Tourism Corporation Bonaire (TCB),
huntu ku sinku partner prosedente di nos isla, a representá Boneiru na e Toronto
Outdoor Adventure Show, ku a tuma lugá for di 20 te ku 22 di febrüari 2026.
Boneiru a hasi un impreshon fuerte na e evento di e aña akí ku kuater stènt di
10×10, ku durante e tres dianan di e feria a atraé hopi bishitante. Representantenan
di medionan di komunikashon, konseheronan di biahe, profeshonalnan for di e
sektor i potensial bishitantenan a mustra interes pa haña sa mas tokante e oferta
variá di nos isla. Boutique Bonaire, Chogogo Dive & Beach Resort, Divi Flamingo
Beach Resort & Casino, Grand Windsock Dive & Beach Resort, Van der Valk Plaza
Resort i TCB a representá Boneiru.
E show a brinda un oportunidat balioso pa fortifiká Boneiru su presensia riba
merkado di Toronto i pa destaká e buelonan direkto kumbiniente di WestJet pa nos
isla.
‘Eventonan manera e Toronto Outdoor Adventure Show ta hasi posibel pa nos
drenta direktamente den kontakto ku biaheronan, medionan di komunikashon i
partnernan komersial, di manera ku nos por krea un kompromiso outéntiko ku
Boneiru komo destinashon. E merkado Canades ta sigui mustra interes grandi den
eksperensianan di biahe aktivo ku enfoke riba naturalesa, di manera ku esaki ta un
punto di atenshon importante pa nos strategia di kresementu riba término largu. Pa
medio di ta presente na e show huntu ku nos partnernan, nos por konta Boneiru su
storia na un manera personal i signifikativo,’ segun Elesiër Angel, direktor di Tourism
Corporation Bonaire.
Bishitantenan di e stèntnan di Boneiru tabatin oportunidat tambe pa partisipá na un
rifa pa un estadia ‘all-inclusive’ na Van der Valk Plaza Resort, inkluyendo e
pasashinan ku avion, loke a hasi presensia di nos isla na e feria èkstra atraktivo.