E aña akí Tourism Corporation Bonaire (TCB) ta selebrá Dia di Tera (Earth Day) ku lansamentu di un promesa di destinashon nobo. E tema di e aña akí ta: ‘Invertí den nos planeta’. Esaki ta e momentu pa Boneiru pa sigui ku su esfuersonan pa preservá i protehá nos isla, nos komunidat i nos manera di biba pa e añanan binidero.
Ofisialmente TCB ta lansa ‘Bonaire Bond’, un promesa di destinashon bon pensá ku a keda desiñá pa invitá nos bishitantenan pa firma un promesa pa biaha na un manera responsabel i pa respetá nos isla ku komo meta pa preservá e forsa natural di atrakshon di Boneiru durante e añanan binidero. A desiñá Bonaire Bond pa kòrda tur hende riba kon krusial turismo sostenibel ta pa e medionan di biba di nos komunidat lokal i pa bai un paso mas aleu, nos isla lo invertí di nobo den su esfuersonan pa preservashon di naturalesa pa medio di adoptá un palu di koral via e fundashon Reef Renewal Bonaire na nòmber di e bishitantenan ku pone nan firma pa e meta akí.
Den e promesa ta pidi bishitantenan pa hasi esfuerso pa respetá nos medio ambiente, pa tene kuenta ku nos bestianan i pa ta konsiente di e laso ku semper nos komunidat tabatin ku konservashon di su alrededor. E promesa ta sirbi tambe komo un instrumento edukativo tokante kon nos bishitantenan por komportá nan mes na un manera sostenibel ora ku nan ta na nos isla.
TCB lo usa vários kanal pa informá nos bishitantenan i pa enkurashá nan pa komprometé nan mes na Bonaire Bond. Tambe TCB lo tuma kontakto aktivamente ku empresanan lokal i habitantenan pa djòin e movementu i ser un ehèmpel, miéntras ku na nan turno nan ta kontribuí na preservashon di e refnan di koral bunita i frágil di Boneiru.
Kon bo por duna sosten?
Partnernan na nos isla i nos komunidat lokal tambe por yuda kompartí informashon tokante Bonaire Bond i e dedikashon di nos isla na turismo sostenibel ku ayudo di instrumentonan di merkadeo i medionan ku nan por kompartí riba nan wèpsait, medionan sosial i boletinnan elektróniko. Riba e wèpsait www.BonaireBond.com tin un tab ‘partner toolkit’ ku instrukshon simpel pa kompartí Bonaire Bond riba bo medionan sosial (Instagram, Facebook i LinkedIn), bo email, bo wèpsait i bo konfirmashonnan di reservashon i den bida real via un ‘QR-code display card’ ku bo por prent.