Mihor conoci como e “fraternan”, e Fraters van Tilburg tabata traha den Caribe pa decadanan largo, y a saca hopi potret di entre otro Corsow, Boneiru, Surnam, Aruba, Trinidad y Guyana Frances y Ingles. Un parti di e coleccion “Herencia di Caribe” di e fraternan ta disponibel online via e website di e museo di e ciudad di Tilburg desde 2018: https://stadsmuseumtilburg.nl/collecties/.
Entrante fin di Maart di 2023 tur potret for di e coleccion di Fraters cu ta trata di Aruba tambe ta parti di Coleccion Aruba: https://coleccion.aw/fraters.
“Dentro di e Proyecto Coleccion Aruba nos ta trahando duro pa pone tur ‘pida di e puzzel’, tur parti di nos herencia di Aruba, di nos cultura, di nos historia, disponibel un solo caminda online. E coleccion di Fraters van Tilburg ta un di e tesoronan fotografico di e herencia di Aruba y di Caribe”, segun Peter Scholing, cu ta responsabel pa digitalisacion, coleccionnan digital y investigacion na Biblioteca Nacional Aruba (BNA).
“Desde 2019 BNA tin su proprio coleccion digital online, cu a crece te casi 50 mil items. Na 2022 coleccion aki a forma e base di Coleccion Aruba, un iniciativa nobo, cu tin como meta pa uni tur coleccion documental, historico y cultural na Aruba y di Aruba. Aparte di BNA Coleccion Aruba tin como partnernan fundador: Archivo Nacional Aruba (ANA) y UNOCA. Mientrastanto diferente partner local a join a e iniciativa aki, manera Museo Arkeologico Nacional Aruba (MANA) y Stichting Monumentenfonds Aruba.”
“E colaboracion cu Stadsmuseum Tilburg riba e tereno di e coleccion di e fratenan ta pas hopi bon den nos vision mas grandi, pa conecta no solamente e coleccionnan cu ta riba nos isla mes, pero tambe trece e coleccionnan cu no ta fisicamente na Aruba ‘bek den nan contexto original’ digitalmente, den e Coleccion Aruba. Recientemente, colaboracionnan y intercambionan asina a tuma lugar cu entre otro e Koninklijk Huisarchief y cu Koninklijke Bibliotheek. Nos ta spera cu nos por anuncia mas colaboracionnan asina cu instancianan Hulandes pronto.”
“E colaboracion aki pa cu e coleccion di e Fraternan tabata un deseo pa basta tempo caba, y mi ta hopi contento cu nos a logra finalis’e, hunto cu Stadsmuseum Tilburg y Erfgoed Brabant! Nos kier gradici Petra Robben, Rien Vissers, Cris Kremers y e Fraters van Tilburg pa nan permiso y pa e cooperacion,” segun Scholing.
Petra Robben, curator di e Stadsmuseum Tilburg: “Mi ta sumamente contento cu e herencia cultural , for di nos database, ta yega un publico hopi mas grandi na Aruba, via Coleccion Aruba. Dor di ‘primi un solo knopi e conocemento di nos coleccion ta bira mas grandi, djies pa via di un intercambio di data”
Rien Vissers, archivista di Fraters CMM: “E archive central di e Fraters van Tilburg (CMM) ta hay’e hopi special, cu e coleccion di potret di e fratenan, cu a biba y a traha na Aruba pa hopi tempo, awo ta disponibel via Coleccion Aruba. E ta un honor pa asina keda forma parti di e historia di Aruba.”
Pa mas informacion di e coleccionnan digital di Coleccion Aruba y di BNA, of pa colabora: tuma contacto cu Peter Scholing (BNA), peter@bna.aw..