Durante un seremonia Militar kòrtiku ‘Compagnie in de West’ Rotashon 38 awe a traspasá nan tareanan pa e siguiente unidat, Rotashon 39. Mediante e traspaso tradishonal di tareanan yamá ‘pebbeloverdracht’ e Komandante Nobo Kapitan Tom Pasman a relevá su predesesor Kapitan John Booyse. Rotashon 39 tambe lo keda aki den Region Karibe pa kuater luna. ‘Compagnie in de West’ (CidW) ta un unidat permanente di Ehérsito Real den Region Karibe, ku por keda desplegá den un variedat di tarea.
E unidat ku ta bai, durante último lunanan, ademas di trein, tambe a entregá un kantidat di apoyo na outoridatnan lokal. Sosten na outoridatnan sivil ta un di e tareanan primordial pa Defensa den Region Karibe. Kapitan Tom Pasman: “Algun ratu pasá mi por a tuma over e komando riba Compagnie in de West. Esaki ta duna un sintimentu dòbel pa ta akinan; miéntras ku tin guera na e parti Ost di Europa, nos ta keda desplegá na West. Sinembargo tambe e despliegue aki ta parti di nos tareanan primordial i loke nos ta hasi akinan ta di igual relevansha. Nos ta mira dilanti riba e periodo balioso aki i ta kla pa e kompromiso aki!’’
CidW 39 ta prosedente di Batayon di Infanteria 12 Trupanan di Asalto di Heutsz, un unidat di Brigada Aeromóbil 11. E batayon, Bravo “Wonju”- no ta unu deskonosí den region. Na 2019 tambe e tabatin un tarea komo batayon CLAS den region Karibe. E intenshon ta ku durante e próksimo 4 lunanan nan lo trein tantu na Aruba, Bonaire komo na Kòrsou.
