Corendon Dutch Airlines ta amplia su skema di buelo den òktober i desèmber 2025 riba e ruta di Amsterdam pa Kòrsou. Motibu pa e oumento ta e demanda kresiente pa stul riba e ruta. Corendon ta bai aumenta e kantidat di buelonan semanal di sinku pa seis den òktober i desèmber. Den 2026 tambe lo bai ehekutá seis vuelo durante e lunanan ariba menshoná.
“Ku e ampliashon den kantidat di asiento riba e ruta, Corendon Dutch Airlines ta satisfase e demanda haltu riba e ruta entre Hulanda i Kòrsou, spesialmente durante luna di outoño i ivierno,” segun CEO di Corendon, Atilay Uslu.
E buelonan ta ser operá for di inisio di e ruta den kolaborashon ku World2Fly, usando un Airbus A350-900 moderno ku un kapasidat di 345 pasahero. E Airbus A350-900 ta konosí komo un avion pa distansia largu ku muchu mas efisiente pa loke ta trata gastu di kombustibel. Esaki debi na su aerodinámika avansá, materialnan leve i motor super efisiente. Anualmente Corendon ta transportá mas o ménos 110.000 pasahero riba e ruta aki, loke ta hasi Corendon un aktor importante den e konekshon entre e dos paisnan.
Corendon ta operá aktualmente sinku buelo direkto pa siman for di Amsterdam pa Kòrsou, esta riba djamars, djarason, djabièrne, djasabra i djadumingu. Djarason i djadumingu e vuelo ta ta bula via Boneiru pa Kòrsou. E di seis buelo ta ser operá riba djadumingu.
E buelonan adishonal ta duna mas libertat di eskoho na pasaheronan ora di plania nan biahe, sea pa fakashon òf bishitá di famia. Kòrsou ta un destinashon stima pa motibu di su klimá tropikal, rikesa kultural i e lasonan fuerte ku Hulanda.
Corendon Dutch Airlines ta parti di e grupo di Corendon i ta oferé buelonan charter i programá na destinashonnan tropikal den Europa, Afrika i e Karibe. Ku énfasis riba komfort aseptabel i servisio amigabel, e aerolínea ta ahustá na e nesesidat di e biahero moderno.
Pa mas informashon, bishitá e website www.corendon.nl òf pasa na e ofisina di Corendon na Scharlooweg 27 na Kòrsou.
