Recientemente Conseho di Minister na Corsou a bay di acuerdo pa reintroduci un moratorio riba toko y minimarketnan entrante prome di october ultimo. A base di e moratorio aki, Ministerio di Desaroyo Economico (MEO) lo no por otorga permiso pa establecimento di toko y minimarket por lo pronto.
E moratorio aki ta den cuadro di un crecemento desproporcional den e cantidad di toko y minimarketnan den algun area di Corsou. Den e mesun decision aki, Conseho di Minister a bay di acuerdo tambe pa MEO hunto cu Ministerio di Trafico, Transporte y Planificacion Urbano (VVRP) desaroya tanto un maneho di establecimento (vestigingsbeleid) como un sistema di registracion geografico (GIS) cual lo ser uza den futuro pa por atende cu peticionnan pa permiso, pero tambe pa yuda acelera e proceso di dunamento di permiso na ambos ministerio.
Inicialmente e moratorio riba toko y minimarket a keda institui for di aña 2014 y a keda prolonga na diferente ocasion. Den e periodo di 2014 te cu awor, MEO entre otro a haci un investigacion pa por a haña miho bista di e situacion en general relaciona cu e tipo di establecimentonan aki, mientras cu hunto cu VVRP a analisa problematica nan relaciona cu congestion di trafico, siguridad den trafico y planificacion urbano.
For di e resultadonan di e investigacion a bin ta desaroya tanto un maneho di establecimento como un sistema di registracion geografico (GIS). E maneho di establecimento (vestigingsbeleid) cu Conseho di Minister a duna aprobacion pa desaroya, ya ta den concepto y e meta ta pa esaki yuda den futuro cu evaluacion di peticionnan nobo pa establecimento di toko, minimarket y otro empresanan cu ta bende comestibel.
Lo tene cuenta cu entre otro e cantidad di habitantenan den e area caminda ke establece un toko of minimarket, pero tambe e distancia for di e habitantenan dje area y for di otro establecimentonan similar. Tambe lo duna miho definicion na cada tipo di establecimento, manera supermercado, minimarket, toko,’ convenience store’ y ‘grocery store’, teniendo cuenta cu e grandura maximo cu cada un por tin y e tipo di productonan cu cada un por ofrece.
E sistema di registracion digital (GIS) lo wordo uza dor di tur dos ministerio pa por visualisa e ubicacion di tur supermercado, toko y minimarket existente, y tambe proyecta kico lo ta e efecto na momento cu otorga un permit nobo na un cierto sitio, na momento cu ta evalua un peticion pa permit di construccion of permit di establecimento.
Ademas e data produci for di e sistema di GIS aki por yuda pa sigui desaroya e maneho di establecimento segun tempo, na un manera mucho mas miho, eficiente y eficaz. E intencion ta tambe pa den futuro cercano haci uzo di e sistema di GIS hunto cu otro instancianan manera entre otro Ministerio di Salubridad, Medio Ambiente y Naturalesa y tambe Brandweer y BAB dor di comparti informacion di cada localidad via e sistema aki, pa asina facilita tanto e dunamento di conseho tocante peticionnan pa permit como e tenemento di control riba establecimentonan.