Actuacion di Minister Gerlien Croes tocante e Departamento di Relacionnan di Reino ta genera fuerte critica politico, cu cuestionnan riba legalidad, autoridad y responsabilidad den gobernacion di Aruba, e minister ta actua contra ley, cu apoyo di mayor parti di parlamentario nan di FUTURO y AVP , pero menos Mike de Meza.
E Departamento di Relacionnan di Reino no ta un cartera independiente, sino un departamento cu, segun ley vigente, ta cay bou di responsabilidad di Prome Minister di Aruba, actualmente Mike Eman. Sinembargo, segun e critica, algun proceso parlamentario reciente a permiti cu Minister Gerlien Croes actua como si e departamento ta bou di su autoridad directo.
Un total di 12 miembro di Parlamento a aproba un cambio den Landsverordening instelling ministeries (LIM). No obstante, segun e argumento presenta, e rol di Prome Minister y di Minister Plenipotenciario ta formalisa den varios otro ley nan cu no a wordo cambia. Esaki ta crea un conflicto legal, pasobra solamente un ley a wordo adapta, mientras cu e otro marco legal a keda vigente.
Segun e critica, esaki implica cu Minister Gerlien Croes ta actua contra ley di Pais Aruba, pasobra un cambio parcial den LIM no ta suficiente pa cambia e autoridad y responsabilidad estableci den otro ley nan. “Si gobierno kier cambia e structura real di autoridad, mester a presenta un cambio di ley completo, cu harmonisacion di tur ley relevante,”
Tambe ta wordo indica cu e actuacion di Minister Gerlien Croes ta kibra e autoridad di Prome Minister Mike Eman, creando un situacion unda decisionnan di Reino ta wordo tuma sin claridad riba ken tin e mandato legal pa haci esaki. AVP como partido mas grandi a permiti e situacion aki, creando un escenario di insiguridad huridico.
E confusion ta wordo aumenta pasobra buitenlandse betrekkingen (relacionnan exterior) ta cay bou di e Departamento di Relacionnan di Reino, pero den practica ta Prome Minister Mike Eman cu ta maneha e dossier aki, mientras cu Minister Gerlien Croes ta presenta su mes como responsabel di e departamento.
Segun parlamentario Edgar Vrolijk e situacion aki ta crea incertidumbre den gobernacion y ta laga duda riba ken realmente tin e autoridad final. E escenario ta wordo describi como problematico pa stabilidad institucional y pa claridad di responsabilidad dentro di gobierno.
A pesar di e actuacion actual, segun ley vigente, mientras cu no tin un cambio legal completo y formal, responsabilidad final pa decisionnan tocante relacionnan di Reino y pa e funcion di Minister Plenipotenciario ta keda riba Prome Minister Mike Eman. Cualquier actuacion contrario ta wordo considera como fuera di marco legal. Pero ken ta esunnan cu mester hala atencion di e decisionnan iresponsabel aki di e gobierno di AVP-UTURO?