Como parti di iniciativa “Light It Up Colorful”, Minister di Turismo, Transporte y
Labor mr. Wendrick Cicilia, tabata presente diaranson anochi na Bestuurskantoor durante e
evento di cendemento di luz blauw enfoca riba promocion di inclusion y conscientisacion di
autismo.
Durante su speech, Minister Wendrick Cicilia a enfatisa riba e importancia di construi un
comunidad cu ta balora cada persona pa su individualidad y caminda inclusion ta un parti
esencial di e desaroyo di Aruba.
“Ta midi e berdadero progreso di un comunidad na su capacidad pa inclui, respeta y balora
cada un di su ciudadanonan. Na Aruba, nos mester sigui fomenta un ambiente caminda tur
hende tin e oportunidad pa desaroya y aporta”, Minister Wendrick Cicilia a enfatisa.
E evento a trece hunto ministernan, parlamentarionan, famia, organisacionnan, boluntarionan y
miembronan di comunidad, kende a reafirma nan compromiso pa un Aruba mas inclusivo y
consciente.
Como un demostracion concreto di sosten, Minister Cicilia a haci un aporte di 5.000 florin na
Fundacion Autismo Aruba, reconociendo e trabou valioso cu e organisacion ta eherce cerca e
personanan cu autismo y nan famia.
E contribucion tin como meta pa sostene e fundacion su esfuersonan continuo den areanan
manera guia, sosten y promocion di inclusion dentro di e sociedad Arubiano.
Gobierno di Aruba ta reafirma su compromiso pa sigui promove iniciativanan cu ta fomenta
inclusion, igualdad y bienestar di tur miembro di comunidad, comprendiendo cu un sociedad
mas inclusivo tambe ta un sociedad mas fuerte.
