E resultado despues di 1 aña di gobernacion di avp future a resulta den un desapunto grandi
pa pueblo. E promes di mas grandi y e punto number 1 di nan programma di gobernacion cu
ta baha costo di bida y mehora poder di compra NO a ser cumpli cune. E tawata simplemente
un enganjo politico y un manipulacion. Awe despues di 1 aña di gobernacion nan NO a
cumpli cu mehora e Calidad di bida, Aruba ta mas caro cu nunca, costo di bida ta mas halto
cu nunca, poder di compra no a ser mehora y tin sla di prijs tur dia y tur caminda. Te hasta tin
fenomeno nobo na Aruba cu ta yama “Geofflation”, inflacion tur caminda den tur sector.
Gobierno no a percura pa trece Alivio pa e costo di bida cu ta afetctando famianan.
E bestaansminimum pa un hogar di dos adulto y dos mucha a subi pa Afl. 5,537, mientras cu
pa un solo adulto a keda na Afl. 2,636, cu un deficit di entrada di Afl. 650, reflehando presion
continua riba costo di bida.
E aumento den e bestaansminimum y e deficit di entrada di Afl. 650,- ta accentua cuanto
presion famianan tin cu nan entrada marginal.Imagina cu na e momento aki na Aruba un
famia di 4 mester Afl 5,537 florin pa sobrebibi. Un solo adulto mester di Afl 2,636 florin
mientras sueldo minimo ta rond di 1900 florin. Ta pesey banco central a bisa cu e clase media
na Aruba ta desapareciendo.
Despues di 1 aña di gobernacion a nombra un gevolmachtogde minister. Despues di 1 aña di
gobernacion minister di turismo ta presenta un concepto di maneho di turismo sabiendo cu
nos turismo ta bao di presion enorme. Tin hopi reto den nos turismo y tin un minister sin
maneho, sin vision y sin perspectiva. Ainda NO tin solucion pa vacation rentals, enfoke di
minister di turismo ta turismo di cantidad y no Calidad. Aruba tourism authority un biaha ta
fungi como banco pa gobierno y ta pone line item nobo den nan presupuesto.
Despues di 1 aña di gobernacion ainda NO tin solucion pa e plantanan di RWZI apesar cu ta
cobra cada turista cu drenta Aruba $20. Ainda tin holor malo banda di bubali plas. No
solamente esaki sino ainda no tin solucion structural pa problema di desperdicio. Nos tin un
promer minister Mike Eman ta cana tur diahuebs y diasabra den barionan ta haci limpieza
mientras Aruba ta birando mas y mas sushi. Planta mata no ta un solucion pa nos medio
ambiente.
No ban papia di nos infrastructura mes caminda e pagado di belasting no ta haya un
infrastrctura cu e merece. Ta parce automobilistanan ta corre riba luna.
Tin un crisis social y crisis den salud mental grandismo y sin solucion. Minister Wyatt Ras ta
asina ausente cu te hasta miembronan di fraccion di Avp ta bise cu nan ta spera mas accion di
su parti.
Loke a a resalta ta e viahenan di ministernan di e gabinete. Viahenan sin motibo, sin
proposito y sin resultado. Ministernan a bai Suiza, nan a bai Hulanda 1 dia, nan a bai
Washington, te hasta private jet ta wordo usa pa ministernan celebra cu seleccion di Corsow.
E falta di respet pa parlamento ta grandi. Gobierno NO ta contesta preguntanan di
parlamento, ministernan ora contesta ta burla di parlamento, chercha di parlamento
contestando cu 1 palabra manera nos a wak contesta di minister Gerlien Croes. No tin
transparencia, no tin informacion y nan no kier duna cuenta na pueblo. Ainda nos ta warda
Gerlien Croes contesta con e la paga, cuanto e la paga y ken a le a paga pa su viahe di luho cu
jet priva.
Surplus laga atras di 500 miyon florin a desaparece y problemanan grandi di pais NO a
wordo soluciona. Nos ta na rand di perde nos Libertad y autonomia pa un sakito di placa.
Gobierno ta entregando nos Libertad sin motibo y sin hustifacion. Mientras Corsow y St
Maarten kier Sali for di rijkswet, aki na Aruba kier hinca nos den algo cu no ta Sali nunca
mas for di dje!
Mester bini cambio pronto na Aruba. E gobierno aki ta un ‘’desgrace’ pa pueblo, un gobierno
cu no a cumpli cu pueblo, situacion na Aruba NO a bira mihor y miles di hende na Aruba
pasando den momentonan dificil.
E conclusion despues di 1 aña di gobernacion ta: CHAOTICO!
