Den un reunion profundo y extenso na Hulanda, e delegacion di Aruba a wordo ricibi pa miembronan di Raad van State. Durante e encuentro aki, a toca diferente tema di gran importancia, specialmente e conseho cu e organo consultativo a publica recientemente, e cual segun Parlamentario Endy Croes, ta confirma un reduccion directo den e autonomia di e isla.
Croes a expresa cu e delegacion ta conforme cu Raad van State ta ratifica e existencia di limitacionnan den e autonomia di Aruba. Segun e parlamentario, Raad van State a señala na dos ocasion caba cu cualkier ley cu tin implicacion financiero mester pasa prome pa Den Haag, un hecho cu e ta considera como un atake directo cu ta ‘kita’ autonomia for di e isla riba e parti ey.
Un di e puntonan di mas di peso durante e reunion tabata e descontento di Raad van State mes structuralmente contra cierto medionan di prensa. Croes a splica cu e organo independiente y profesional aki a mustra su molestia pa e forma con cierto medionan, entre nan e portal Koningsrijksrelaties, a publica e conseho fuera di su contexto real.
E parlamentario a bay mas leu y a lamenta cu inclusivo un minister na Aruba de facto a comparti e parti incorecto y fuera di contexto aki riba su cuenta di Facebook. Esaki, segun Croes, a causa molestia den e seno di Raad van State, kendenan actualmente ta den un reunion interno evaluando e mesinterpretacion aki di nan conseho, y pa cual mientrastanto ta wordo spera un reaccion oficial di nan parti.
E debate oficial lo tuma luga den Parlamento na Aruba, no aki na Hulanda. Endy Croes, Parlamentario (Fraccion di MEP) a indica
A pesar cu e reunion a trece hopi claridad riba puntonan cu no tabata structuralmente den e conseho publica, Croes a enfatisa, den nomber di fraccion di MEP, cu e polemica y e debate oficial mester wordo debati den e seno di Parlamento di Aruba, dilanti di e pueblo Arubano, y no na Hulanda.
Finalmente, e delegacion a gradici Raad van State pa e recepcion y e espacio pa clarifica e puntonan aki, caminda a keda reenforsa cu e limitacionnan financiero y legal structuralmente ta hancra den e conseho presenta.
