Desde prome di maart HOH ta un hospital liber di huma

Promoviendo bida mas saludabel y cumpli cu ley stipula pa Gobierno di Aruba

Minister Oduber ta aplaudi HOH pa ta prome instituto cu ta tuma e paso grandi aki 

Horacio Oduber Hospital como instancia publico cu ta brinda cuido y alabes cu tin como meta promove un bida mas saludabel entrante 1 di maart ta anuncia cu HOH ta un hospital liber di huma! Ademas, como instancia publico Hospital kier duna e bon ehempel na comunidad di Aruba y tambe cumpli cu e cambionan den ley cu Gobierno di Aruba a introduci aña pasa cu ta limita mas aun e uzo di productonan di tabaco. Esaki ta nifica cu ni colega, ni pashent, ni cliente y tampoco bishitante ta permiti pa huma riba tereno di HOH, LABHOH y Bloedbank ni tampoco paden di edificio manera ya esaki tabat e caso. Esaki ta conta tambe pa e parkeo, tur policlinica rond di HOH y e caminda pa e ‘suppliers’ cu ta drenta y sali di Hospital. E regla aki ta valido pa tur hende y ta inclui entre otro sigaria, otro productonan di tabaco manera cigar y sigaria electronico (vaping pens) y cualkier otro tipo cu tin como contenido tabaco.

Un momento importante pa Aruba y Hospital mirando cu HOH semper a prohibi humamento paden di edificio y desde1 di maart ta e prome instancia di cuido cu a añadi tambe prohibicion riba tereno completo. Pues pa un momento historico asina Hunta di Directiva di HOH, esta sr. Jacco Vroegop hunto cu sr. Gregory Croeze a extende un invitacion na Minister di Salud Publico, sr. Dangui Oduber pa di forma simbolico durante un conferencia di prensa cuminsa cu e trayecto nobo y saludabel aki. Minister Oduber a indica na inicio di e conferencia di prensa cu e ta aplaudi e paso grandi aki cu HOH ta tuma y alabes ta felicita HOH como e prome instituto cu ta haci esaki oficial. Ya pa algun luna HOH a anuncia di ta na caminda pa un Hospital liber di huma y awe oficialmente, 1 di maart 2023 esaki ta un realidad pa HOH, LABHOH y Bloedbank. 

Loke a start e mecha di e proyecto aki di HOH ta cu Gobierno di Aruba a introduci dia 2 mei 2022 e ley cu ta limita uzo di productonan di tabaco y HOH na su luga como un instancia publico mester cumpli cu e ley nobo aki. Un di e metanan di e ley aki ta pa desanima publico pa haci uzo di productonan di tabaco. 

“HOH, LABHOH y Bloedbank tin como punto di enfoke brinda e miho cuido y servicio posibel na nos pashentnan y clientenan. E salud di nos empleadonan, pashentnan y bishitantenan ta nos prioridad y p’esey como e unico hospital riba e isla y pues tambe embahadornan di cuido di salud na Aruba a tuma e decision pa haci Hospital liber di huma y pues no sigui facilita humamento mas”, segun sr. Vroegop di Hunta di Directiva. 

Hospital ya pa algun luna ta trahando duro dunando informacion y ofreciendo colega trayecto di coaching si nan tin interes pa stop di huma lidera pa e specialistanan di pulmon. Tambe a traha riba un plan si encaso un pashent admiti den HOH tin un of otro adiccion na un producto di tabaco con lo anda cu esaki y ki caminda lo por cana pa brinda asistencia. 

“Desde september 2022 ya a introduci zonanan temporario di huma riba tereno di HOH pa empleado, pashent y bishitante pa asina cuminsa promove un hospital liber di huma. E zonanan temporario aki tambe a yuda esnan cu ta huma pa gradualmente custuma cu e idea aki. Desde awe, 1 di maart e zonanan temporario di huma no t’ey mas. Pues desde awe si ta humando cualquier caminda nos lo pidi’bo encarecidamente pa stop inmediatamente pa motibo cu HOH no ta permiti esaki mas y alabes tin cu cumpli cu ley stipula pa Gobierno,” asina sr. Croeze di Hunta di Directiva a indica. 

HOH, LABHOH y Bloedbank ta consciente cu esaki por tin un impacto grandi riba esnan cu tin un adiccion na tabaco. Pero ta spera di por conta cu sosten y cooperacion di comunidad henter pa asina hunto nos traha riba prevencion y alabes tin un impacto positivo riba salud publico.