Riba 1 october 2022, despues di 3 decada di retraso, falta di liderasgo y negligencia, Aruba finalmente a establece Departamento di Mucha y Hoben (DMH). Su base legal tabata hopi cla: Aruba a ratifica e Tratado di Derecho di Mucha na 2001, comprometi pa salvaguardia y garantisa derecho di mucha, unda na juni 2017, un biaha mas Parlamento di Aruba complete a aproba e ‘show’ di Landsverordening Kinderopvang (KOPV) pa regula e Centronan di Cuido di Mucha, cu a inicia for di 30 aña pasa. A crea Departamento di Mucha y Hoben pa reinforsa e ley, supervise e centronan di cuido di mucha y segura intervencion trempan pa e muchanan cu limitacion den nan desaroyo.
Awor na 2025, e minister en cuestion ta indica cu el a cera e departamento. Un decision cu a bin sin ningun investigacion publico, sin evaluacion di prestacion y cu un structura alternativo cu pa 30 aña no a funciona, door di pone bou di capa di enseñansa of social, manera cu e tabata. Aruba ta un di e masha poco paisnan den region, cu ainda no tin regulacion di centro di cuido di mucha y ta un preocupacion nacional grandi, unda nos tur sa di varios incidente cu a y ta tumando lugar cu mucha.
Promesanan kibra na e mayornan
Cada biaha cu tin un incidente den un centro di cuido di mucha, Aruba ta bira boca abou y tur hende ta cuestiona, critica y exigi pa bin cu ley y regulacion, E historia di regulacion di centro di cuido di mucha ta uno di decada neglisha, specialmente si mira historia unda cu for di 1998 a aproba e prome iniciativa di ley den Parlamento. Pero semper el a keda riba papel y presentacion y show politico.
Un sin fin di comision den 30 aña, instancia (KPMG, SER) y organo di conseho ripitivamente a adverti y conseha cu e ley mester drenta su fase urgente di implementacion. Sinembargo e añanan ta pasa, incidentenan ta sigui pasa, cu un sin fin di concepto, obstaculo legal y shifting di responsabilidad. Imagina bo, cu aunke Aruba a perde varios criatura inocente, unda famianan ta keda cu trauma, un bashi enorme y dolor pa bida, e centronan di cuido di mucha ainda ta opera sin ningun tipo di supervision consistente, control di calidad di cuido of reinforsamento legal.
DMH: Kibrando un ciclo di negligencia
E instancia di DMH tabata destina pa trece cambio. Su mandato oficial tabata ambicioso y necesario:
• Registra y duna permiso na e centronan di cuido como un instancia cu ta cay bou di gobierno, paso gobierno ta responsabel pa duna permiso pa opera un centro di cuido di mucha.
• Supervisa seguridad, higiena, cualificacion di personal y standard pedagogico.
• Implementa programa y guia structural di intervencion trempan na e centronan.
• Desaroya maneho di mucha y hoben cu ta alinea cu e Tratado di Derecho di Mucha
Debilidad den structura, pero no fracaso
Entre 2023–2024, mas di 70 centro di cuido di mucha a participa den e training di Codigo di Proteccion y upgrading di e personal cu nan MBO3, unda hasta un grupo a sigui cu nan MBO4.
Varios documento presenta na e minister anterior a indica cu tin cierto desafio cu a trance e proceso di implementacion, cu ta fundamental y tabatin mester atencion inmediato. Pero un biaha mas, negligencia, boluntad of falta di liderasgo di parti di gobierno y minister en cuestion, no a pone nos muchanan central y resolve un problema di mas di 30 aña.
Un shortcut politico
Cu e ceramento di DMH ta refleha mas un falta di credibilidad di parti di e minister actual. No a presenta rapport di evaluacon, no a comparti estudio di impacto, no a brinda un roadmap pa ilustra kico ta bin awor. Con lo regula e centronan di cuido di mucha? Si Dienst Inspectie Onderwijs no ta ni regula enseñansa manera mester ta, mucho menos presenta rapport di nan resultadonan pa comunidad sa kico ta pasando den enseñansa? Con ta bay segura cu e centronan di cuido ta cumpli cu e ley di KOPV? Ken ta bay protega y salvaguardia e muchanan cu tin limtiacion cu nan desaroyonan den e fase crucial, cual na scol mes pa meld un mucha ora e yega kleuter, ta un caminda di cruz di minimo 2 aña?
Pa conclui mester resalta cu tabata mihor pa fortalece DMH, pone supervisor, cumpli cu e ley KOPV porfin y asina e minister por a scoge un caminda mas sigur y ya traha, en bes di cera e departamento. E consecuencia ta un paso gigante den pasado, unda finalmente e muchanan ta esun perhudica. E decision aki ta exigi cu un hende mester para responsabel, pa tur e placa di pueblo inverti den DMH, e pasonan ya traha y Aruba merece pa haya contesta awor. Y no ora cu algo bolbe pasa…Si liderasgo ta nifica algo pa e minister actual, e mester sa di defende esunnan mas vunerabel y sin bos. Y actualmente e muchanan di Aruba a keda silencia pa politica.