Diabierna awor, 19 Juni 2026, den Corte di Husticia ta trata e caso penal cu Ministerio Publico a cuminsa contra Israel Jesus Paesch (40). E ta wordo acusa cu dia 23 Augustus 2025 el a tira su primo Rene Paesch mata.
Por a compronde cu a tuma henter Diabierna pa tratamento di e caso aki.
Dia 6 di Maart 2026, Israel a presenta den Corte pa e caso pro forma. Den sala di Corte tabata presente e ruman muher di e victima. E acusacionnan cu Fiscal a presenta contra Paesch ta cu riba 23 Augustus 2025, Isreal Paesch a tira mata Rene Paesch. Tambe cu Israel Paesch tabata den posecion di un arma di candela y tabata den posecion di cocaina.
PROCESVERBAAL Y INTEROGACION DI DOS TESTIGO TA CLA
Abogado mr. Arends Marchena ta e abogado di Paesch. Hues a bisa cu dia 4 December 2025 tabatin un pro forma y a palabra cu lo tin e procesverbaal cla y awor tin procesverbaal. Tambe Hues a bisa cu awor tin un raport di psycologo y psychiater. Tambe cu tin dos testigo cu a wordo scucha na Hues Comisario.
TIN VIDEONAN Y GRABACION DI SONIDO
Fiscal a bisa cu e tin video di seguridad di Lekker Bar y un otro lugar caminda lo por mira Paesch. Hues a pidi Fiscal pa ta bon pa specifica e imagennan riba e videonan cu e ta haya interesante. Hues a pidi abogado mr. Arends Marchena pa e tambe specifica kico di parti abogado ta interesante riba e videonan.
LO NO BAY PASA VIDEO DEN CORTE
Hues a bisa cu e no ta haya cu lo ta ideal pa bay pasa videonan den Corte. El a bisa cu tin idea di bay scucha grabacion di sonido. Hues a puntra pa investigacion Forensic di un huls cu lo a haya den un Suzuki Swift. Fiscal a bisa cu e lo averigua esaki.
ACUSADO NO KIER PAPIA MAS
Hues a bisa cu tabatin planea un di tres interogacion di parti di Polis, pero Paesch a bisa cu e no ta bisa nada mas ni awor y tampoco despues. Hues a puntra Paesch, si Paesch lo bay contesta preguntanan durante tratamento di e caso. Paesch a bisa Hues cu ainda e incidente ta traha riba dje y e no kier bay recorda mas loke a pasa. Hues a bisa cu e ta compronde cu e caso ta dramatico pero cu durante tratamento di e caso e lo bay haci preguntanan caminda e kier haya claridad. Paesch a bisa cu ta depende kico, e lo wak si e lo papia.
TRATAMENTO LO BAY DURA FULL UN DIA
Hues a puntra Fiscal, cuanto e ta calcula cu su requisitorio lo bay dura. Fiscal a bisa Hues cu e ta calcula cu e tratamento di e caso lo bay tuma un dia of mas. E ta calcula cu su requisitorio lo bay ta 30 minuut. Hues a puntra mr. Arends Marchena cuanto e ta calcula su defensa lo bay tuma. Mr. Arends Marchena a bisa cu entre 30 y 45 minuut su defensa lo bay dura.
Hues a bisa cu e ta planea pa mainta trata e caso completo y merdia lo ta requisitorio y defensa. Hues a stipula 19 Juni 2026 pa tratamento di e caso. E ruman muher di e victima a bisa cu e kier haci uso di e derecho di expresa su mes y Hues a bisa cu lo tene cuenta cu esey.