Resientemente, den un diskurso históriko, poderoso i emoshonal na Nashonan Uni, Joseline Thielman, miembro fundador di Muhernan Fuerte , ala femenino di Pueblo Progresivo Uni i ofisial di polis ku mas di 30 aña di servisio riba e isla di Boneiru, a duna un diskurso ku a laga un marka profundo riba e realidat duru ku muchanan di desendensia Afrikano ta enfrentando bou di e sistema kolonial Hulandes.
Papiando na nomber di Organisashon di Derechonan Humano di Boneiru, Sra Thielman a papia na Nashonan Uni na New York, no solamente komo un profeshonal di kuerpo polisial, sino tambe komo un mama. Su demanda pa hustisia a enfoká riba e daño sikológiko i kultural ku ta wordu kousá na muchanan Boneriano pa motibu di diskriminashon sistemátiko den sistema di edukashon i henter komunidad.
“A pesar di mi anjanan di eksperensia i mi kompromiso firme, mi ta para aki awe sintiendo mi mes totalmente impotente,” Thielman a bisa na e asamblea internashonal.
“Mi no por sigui para na banda keda ketu sin aktua, mientras ku muchanan Boneriano — inkluso mi mes yu — ta viktima di diskriminashon struktural, opreshon mental I danjo sikologiko”
Thielman a splika kon e muchanan di desendensia Afrikano na Boneiru nan identidad kultural ta wordu elemina, nan ta wordu ekslui di e derecho pa papia nan idioma nativo, i ta wordu tacha inkorektamente komo intelektualmente inferior pa falta di habilidad den idioma Hulandés — un legado di modelo edukativo kolonial ku a wordu imponé despues di e disolushon di Antias Hulandes.
“Esaki no ta un asunto di limitashon o falta personal,” e a enfatisá. – “Esaki ta konsekuensia di un struktura edukativo i sosial diskriminatorio ku ta profundamente impone I institui”
E resultado, segun su atvertensia, ta un krisis di salú mental entre muchanan vulnerabel, karakterisá pa aumento den kasonan di trauma, hasi dañonan na propio kurpa, tendensia di suisidio, i envolvimentu den aktividadnan kriminal — tur esakinan nan raiz ta e frustrashon ku ta bini di marginalsashon sistemátiko.
Den su diskurso, Thielman tambe a revela e riezgo personal di esnan ku ta duna nan opinion publikamente. E a indiká ku e mes a sufri intimidashon i intento pa silensia su bos den su esfuerso pa defende su yu i otro muchanan.
Su mensahe tabata kla i urgente: “E muchanan di Boneiru, partikularmente esnan di desendensia Afrikano, tin nesesidad urgente di boso intervenshon. Nos ta pidi boso yudansa pa enfrenta e krisis profundo di derechonan humano ku nos ta bibando.”
E diskurso históriko aki ta marka un punto di kambio den e rekonosimentu internashonal di violashon di derechonan humano ku ta tumando lugar na Boneiru, i ta pone preshon riba gobernashon Hulandés pa tuma responsabilidat pa e inhustisianan sistemátiko i e sistema kolonial ku ta kontinua nos den bida di awe i ta afektando e teritorio Karibeño.
