Riba Djabièrnè, 24 di Yanüari, dos Militar di Kòrsou, Teniente Koster i Teniente Carmelia, a ser promové komo Ofisir. Un logro spesial. E último biaha ku ku un Militar di Kòrsou a keda promové komo Ofisir, tabata na 2021, e tempu ei tabata a aktual Komandante di CURMIL, Kapitan Meulens.
Entrenamentu pa bira Ofisir
Teniente Carmelia i Teniente Koster a kuminsá na Sèptèmber 2023 ku e Kurso Práktiko pa Ofisir di Marina na Hulanda. Einan nan a finalisá e promé dos fasenan. Na kuminsamentu di 2024 nan a bolbe bèk na Korsou pa sigui e Kurso Práktiko pa bira Ofisir di CURMIL/Milisia di Kòrsou. E kurso aki a keda revisá, pa prepará Ofisirnan pa nan tareanan, no solamente riba konosementu teorétiko, pero spesialmente esun práktiko. Bou di guia di Sentro di Formashon Carib/Opleiding Centrum Carib i CURMIL, e dos Militarnan a keda intensivamente di tèst riba abilidatnan táktiko, étika i nan abilidat pa liderá bou di diferente sirkunstansia. Na e momentunan aki un Militar di Aruba ta partisipando na e Kurso pa Ofisir na Hulanda.
Profeshonalisashon di Militarnan di Karibe
E promoshonnan di Teniente Koster i Teniente Carmelia ta aportá na profeshonalisashon di Militarnan di Karibe, kual ta konsistí tantu di Militarnan di Kòrsou komo di Aruba. En total awor aki tin sinku Ofisir di Kòrsou.
Teniente Koster ya tin mas ku 7 aña di eksperensia dentro di CURMIL. Su deseo ta pa implementá su konosementu i eksperensia pa desaroyá CURMIL i di hasi esaki un unidat di kalidat haltu i profeshonal. Teniente Carmelia a kuminsá ku su karera Militar na 2021 i durante e último añanan no solamente a desaroyá su abilidatnan di liderazgo, pero tambe un ambishon evidente pa sigui studia riba tereno di atministrashon di negoshi òf gestion di logístika.
