Hues diaranson mainta a bari e demanda di Ducapro for di mesa y a confirma cu mientras Aruba no tin un legislacion cu ta regula e uzo, distribucion y representacion di derechonan di autor, no ta rasonabel pa demanda pago di usuarionan manera e radio emisora Hits100FM (Q-waves). Ducapro su demanda tawata pa declara cu Hits100FM lo a actua encontra di nan derecho (onrechtmatig) como representante di derechonan di autor. Segun Ducapro nan lo tin e autoridad pa duna permiso na usuarionan di musica, haci cobranza pa e uzo aki y distribui e cobranza na e autor di musica a base di un contracto cu Buma/Stemra.
Hits100 a reconoce cu nan ta haci uzo di musica y ta dispuesto pa paga e autornan di musica pa e uzo aki. Sinembargo Hits100FM ta duda cu un pago na Ducapro lo significa cu nan si lo por haci uzo di musica cu permiso di autor di musica.
Den e veredicto hues a subraya cu Buma/Stemra por actua encontra di usuarionan di musica segun ley di Hulanda. Na Aruba no tin base legal cu ta regula e uzo, distribui y representacion di derechonan di autor. Es mas, e contracto cu Ducapro lo a cera cu Buma/Stemra ta stipula cu e autoridad pa representa derecho di autor ta den forma no exclusivo. Pues si Hits100FM paga Ducapro mes pa uzo di musica ainda, Hits100 no tin ningun garantia cu e autor di musica y/of Buma/Stemra mes ta duna permiso pa e uzo aki. Sin base legal cu ta stipula e autoridad pa representa e autor di musica of cu ta regula e cobranza cu representante di e autor di musica por cobra y e forma cu e cobranza aki lo mester wordo distribui, e demanda di Ducapro no ta rasonabel. Hues a rechasa e demanda di Ducapro y su abogado mr. David Kock y Ducapro a ser condena pa cubri e gastonan di e procedura. Sr. Aldrich Croes director di Hits100FM (Q-Waves) ta gradici nan abogado mr. Gabriela Sjiem Fat pa a defende nan compania y tambe interes di tur e Radio emisoranan di Aruba. Actualmente e Radio emisoranan hunto cu Canalnan di Television ta trahando riba un structura pa yega na un asociacion