Durante un conferencia di prensa recien duna pa Grupo di Betico, Minister Xiomara Maduro di Cultura a resalta e rol significante di tradicionnan cultural den e temporada di fiesta nos dilanti. E conferencia, cu a tuma luga na Renaissance Convention Center, tabata enfoca primordialmente riba e concierto anticipa di Grupo di Betico cu lo tuma luga dia 7 di december na Renaissance Convention Center.
Minister Maduro ta apoya e iniciativa di Grupo di Betico, comentando, ‘Mientras nos ta acercando e temporada di fiesta, ta esencial pa recorda y celebra nos herencia cultural. E concierto di Grupo di Betico no ta solamente un evento musical; e ta un ehempel unico di nos tradicionnan, creencianan, y di locual ta biba den nos comunidad.’
Ela a añadi, ‘Musica y arte semper a yuda uni comunidadnan y pasa nos bunita tradicionnan di un generacion pa e siguiente. Mi ta contento di mira iniciativanan asina cu no solamente ta entretene, pero tambe ta educa y mantene nos raiznan cultural bibo. E concierto aki ta un esfuerso ehemplar den e direccion aki.”
E mandatario tambe a enfatisa e compromiso pa apoya actividadnan cultural cu ta enrikece e comprension y aprecio di e comunidad di nan herencia. ‘Nos ta dedica na promove eventonan cu ta resona cu nos balornan cultural, specialmente durante temporadanan di celebracion manera ta e temporada di fiesta. Nos ta kere cu e eventonan aki ta reafirma nos identidad y ta uni nos como comunidad,” Minister Maduro a finalisa.
Un invitacion ta bay na pueblo di Aruba pa acudi na e concierto di Grupo di Betico cu lo tuma luga diahuebs 7 di december den Renaissance Convention Center.
