E avion di patruyahe Dash-8 di Wardakosta Region Karibe riba 29 di Mei a deskubrí un boto chikitu sospechoso den Laman Karibe. Zr. Ms. Friesland a tuma rumbo pa e boto i direktamente a lansa dos FRISC-botonan di intersepshon rápido. A sigui ku un persiguishon durante kua e kontrabandistanan a tira e droganan den laman. Mas ku 100 pakete droga a keda saka for di den laman; un total di 1.837 kilo kokaina i 1.173 kilo di mariwana. E droga ku a konfiská a keda entregá na Wardakosta Merikano.
Komandante di Zr.Ms. Friesland, Kirsten Gouw-Savelberg, ta enfatisá e importansia di despliegue rápido i kolaborashon internashonal: “E intersepshon eksitoso aki ta demostrá di kiko un ekipo bon di trein i integrá ta kapas. Nos ta kla pa loke ta bai bini.”
Zr.Ms. Friesland dos siman pasá, dia 23 di Mei, a yega den Region Karibe i for di e dia ei e ta e barku stashoná den Region Karibe pa Defensa. Ehekushon di operashonnan anti droga ta un di su tareanan. Den esaki e barku ta traha interkambiando huntu ku Wardakosta Merikano i Wardakosta Region Karibe. Banda di esei e barku ta para kla pa brinda yudansa humanitario, por ehèmpel na momentu di desasternan natural, tal manera un orkan.
