Politica

E coalicion cu ta forma gobierno ta un titanic cu ta den rumbo pa zink

Eric Ras

Nos tin un gobierno cu ta hasi como sifuera cu nan ta doño di Aruba. Aruba ta den un situacion financiero precario y nos tin un gobierno cu no kier baha gasto y ta sigui malgasta placa di pueblo.  E rapport di CAFT ta nombra minister di salubridad cu tempo cu e tabata den oposicion tabata grita di lo investiga e construcion di hospital. Ta parse cu e construcion nunca a termina y pa via di retraso gobierno a hinca den e presupuesto 10 miyon florin y mas pio ainda sin cu nunca a bin cu un investigacion. CAFT kier pa gobierno pone un punto final den e construcion di e hospital y pa no hinca mas placa. 

Gobierno a pone un suma di placa den presupuesto pa inversion na Parkietenbos pero CAft ta cuestiona  inversion aki di e Minister di Medio Ambiente . Ningun momento gobierno ni  tampoco Minister Ursell Arends  ta duna un splicacion adecuado of hustificabel. Un otro tema cu a hala atencion di nos pueblo ta con den secrecia kier sigui pusha pa e molinanan di biento. Minister encarga cu energia ta sinta trose e berdad pa cueste lo que cueste e deal di molinan di biento tuma lugar, anto den un contract cu pueblo no por sa di e contenido. Danki na sr Richard Frank cu sin miedo a laga su voz resona contra di locual e minister di energia kier hasi. No ta basta cu e contract di Eagle LNG awor kier hinca WEB NV den mas aventura. E minister ta bula bay Ecuador pa busca pa heavy fuel oil riba un prijs mas barata y no ta tene cuenta cu lo barato sale caro. Tur skina aki na Aruba bo ta tende hendenan ta keha cu nan tarifa di awa y electricidad a subi cu 100%. 

Januari 2023 BBO ta bira 7.5% y esaki lo bira un otro peso riba custia di pueblo di Aruba. Esaki lo ta hinca atrobe den prijs di setar, di gasolin y otro cosnan. Gobierno su projecto di sigui suta pueblo cu medida ta sigui pero no sa di corta gasto den su propio seno. Gobierno ta sigui hunga cu nos pilar economico cu ta turismo. For di aña pasa e rapport riba RWZI a splica cu e planta ta den estado deplorable y te dia di awe no a hasi nada pa remedie. Un gobierno di desaster.

Nos por a mira un carta cu ta circula cu for di aña pasa trahadornan di Cas di Aruba a manda pa minister president y den e carta ta relata e desaster financieroh causa pa minister plenipotenciario. Den e carta tin hasta poni pa no laga e minister ni participa na eleccion. Nos sa cu minister president tin e rapport di CAD bon scondi bao di su brasa pa e berdad no sali nan cla. Un gobierno cu kier papia di integridad pero den realidad no tin nada di integridad. E gobierno aki ta morto caba y solamente e falta pa cuminsa hole. 

E coalicion di titanic aki a zink caba. Esnan cu ta sabi lo subi den e salba bida pa nan por sobrevivi. Hopi tristo ta cu parlamentarionan di coalicion cu ciegamente ta defende gobierno.  E grito den desierto no ta yuda mas y cu ki cara nan lo bay cana den pueblo pa pidi pueblo su confiansa. Parlamentarionan mester sa si nan lo ta complice di maldad of lo hala un banda y para pa bienestar di pueblo. Esun cu sembra maldad lo cosecha maldad. E inhusticia comete contra di pueblo di Aruba nan lo no scapa di dje. Dios ta mira tur cos cu a sosode den secrecia y lo ricibi nan cosecha. Mas puyito lo sigui sali for di e macuto.

Related posts

Marlon Sneek (AVP) na Minister Marisol Lopez: Ta pa ken Gobierno a regla tereno prominente na Arashi?

EA News Author

Robert Candelaria (AVP): No ta momento pa experimenta cu partido sin experiencia

EA News Author

Minister Dangui Oduber: Hopi turista bishitando e Visitor Information Center na San Nicolas

EA News Author

Leave a Comment

Whatsapp Message