ORANJESTAD,Aruba
Directora di Guarda Nos Costa Sra. Trudy Hassell dialuna atardi a informa cu den oranan di merdia e dos damanan di conoci pa patruya 37, a wordo hiba conforme cu leynan, dilanti Hues Comisario pa toets nan detencion si tabata corecto si of no y ta mara tambe na deportacion. Diasabra ultimo Guarda Nos Costa a bay aeropuerto y ta detene e personanan aki momento cu nan tabata cla pa sali di Aruba. Mesora a haci e detencion cu un meta pa garantisa cu e personanan aki por lo pronto no por regresa Aruba. Nan a keda deteni na aeropuerto y treci Guarda nos Costa y mesora a traha nan bevel in bewaringstelling y expulsion. Dialuna merdia Hues Comisario a tuma su decision unda el a bisa, cu mirando cu a detene e personanan na aeropuerto, na unda nan tabata bayendo afo, no Venezuela unda nan mester bay pero tabata bay otro pais Hues ta haya cu no mester a detene nan. Esey a haci cu e bewaringstelling ta onrechtmatig. Pero si e bevel pa expulsion ta keda vigente y esey por wordo ehecuta. Pa Sra. Hassell esey ta e meta principal di e detencion di Guarda Nos Costa pa cu e damanan aki mira e daño cu nan a causa na pais Aruba. Esaki a trece cu ne, cu nan peticion pa asilo a wordo nenga y e momento ey nan a cay den e pool di personanan ilegal na Aruba y nan mester a sali pa nan pais di origen. Awor aki e personanan aki lo wordo expulsa y por lo pronto no por regresa Aruba. Pa Guarda Nos Costa nan meta ta cumpli.
