A petishon general ta sigui ku ayudo ku QR Code djasabra 11 di Desèmber
Mas di 100 persona ku a akudí na sede di Partido MAN djasabra ùltimo, a haña asistensia di miembronan di MAN pa aktivá nan QR Code.
Alabes hopi a opta tambe pa laga traha nan QR Card na un preis speshal ofresé pa Smart Outsourcing and Business Consulting (SMART), un empresa privá ku ta eksperto den solushonnan digital, ku a asesorá Partido MAN riba e dia ei.
Un testimonio bibu ta ora un bishitante a mèldu ku djasabra anochi mes, e por usa su QR Card pa asisti na un evento públiko i kon fasil e proseso a kana pa e por haña entrada na e evento.
Ta pesei Partido MAN ta wak bèk ku satisfakshon na e evento: Mi QR Code! Partido MAN ta duna bo un Man ku bo QR Code.
Aktualmente, un di e medidanan di prekoushon i prevenshon ku a keda tumá dor di Gobièrnu di Kòrsou , ta ku ta rekerí e prueba digital di bakunashon (DCC) i e QR Code den forma digital of den hard copy, na diferente sitio di dibertinahe i tambe na eventonan ku ta tuma luga den un espasio definí ku kontrol na entrada.
Tambe ora di biahe, ta mas fasil pa biaha ku e prueba digital di bakunashon (DCC) i e QR Code embes di e karchi di bakuna (hard copy).
Partido MAN, konsiente ku pa hopi hende e ta un reto pa por aplika pa e prueba digital di bakunashon (DCC) i e QR Code importante aki, a organisá e evento MI QR Code kaminda esnan ku tin difikultad di registrá pa nan prueba digital di bakunashon (DCC) i e QR Code, a keda yudá.
Dor di eksito di djasabra ùltimo, Partido MAN lo bolbe organisá e evento Mi QR Code! Partido MAN ta duna bo un Man ku bo QR Code, djasabra 11 di desèmber di 9’or di mainta pa 12’or di merdia na Sede di Partido MAN na Rooseveltweg.
Mester bini ku e ID (ku a usá ora a bakuná), e karchi di bakuna i bo telefòn. Si ta deseá, nos por print e QR Code riba un A-4 tambe kompletamente gratis!
Tin posibilidat pa esnan ku kier of ku tin nan QR Code kaba, pa laga traha nan QR Card na un preis speshal di Nafls. 8,- kèsh (normalmente Nafls. 10,-) ku koperashon di SMART.
