Nos kier informa nos clientenan cu nos ta continuando cu e proceso di reemplazo di tur meter pa Smart Meters. Debi na e pandemia, e proyecto a conoce un retraso. Mientrastanto tur cliente cu a aplica pa un meter nobo a ricibi un Smart Meter y e meternan cu no ta accesibel pa wordo lesa facilmente a wordo cambia pa Smart Meter.
Te awor, un total di 50% di nos clientenan tin Smart Meters. Den e lunanan venidero, nos lo ta hopi activo instalando mas Smart Meters nobo. E siman aki ELMAR a cuminsa den e area di Amistad y Babijn, y asina lo continua riba henter nos isla. Importante pa sa, e implementacion aki no lo rekeri ningun accion di parti di nos clientenan. E suministro di coriente lo continua di un forma normal.
ELMAR ta trahando incansabel pa crea un Smart Grid. E meternan moderno aki ta facilita esaki. E Smart Meters ta comunica y provee informacion tocante di e meternan riba un punto di acceso. E ta permiti nos monitoria e uzo di energia den tempo real. Si tin un problema cu e red of riba e red unda cu tin Smart Meters, nos ta haya un alarma inmediatamente for di e meter. Locual ta permiti nos identifica problema mas lihe y resolve nan mas eficiente. Esaki ta permiti nos brinda informacion mas preciso tocante e uzo di energia na nos clientenan. E Smart Meter ta ricibi e “meterstand”, esta e uzo di cliente, via un sistema wireless.
Nos ta gradici nos clientenan pa nan confiansa den nos. Cu esaki nos ta sigui e vision di ELMAR pa sigui traha pa brinda un miho servicio na nos clientenan. Si bo tin cualkier pregunta tocante e implementacion aki, por yama nos departamento di Customer Service na 523-7100.