Entidad Publico Bonaire, den colaboracion cu e cadena hudicial, a organisa un encuentro Compas pa hobennan cu ta wordo considera como vulnerabel of den risico pa motibo di ausencia escolar duradero, abandono di scol i/of contacto cu husticia. E encuentro a tuma luga na Jong Bonaire y a trece hoben, mayornan y profesionalnan hunto pa trata e tema di prevencion di violencia cu arma di candela bou di hoben.
E foke di e encuentro Compas tabata pa duna perspectiva y crea un caminda alternativo pa hobennan cu ta den peligro di slip drenta criminalidad y violencia. Bou di e lema “For di vulnerabel pa perspectiva”, a papia cu e hobennan y nan mayornan tocante responsabilidad, siguridad, posibilidadnan pa futuro y haci escohonan positivo.
Durante e reunion, Gezaghebber John Soliano a encurasha y motiva e hobennan pa haci escoho positivo pa nan futuro. “Nos por haci hopi pa boso, pero e decision final ta keda na boso tambe. Boso por scohe pa sigui e caminda corecto,” asina Gezaghebber a bisa.
Ademas, dos persona cu experiencia propio (drop-outs) y dos polis di bario a comparti nan historia y experencianan personal cu e publico. Durante esaki a pone atencion riba e consecuencianan di violencia y criminalidad, pero tambe riba e importancia di guia, sosten y oportunidadnan pa cambio. Plenchi di Trabou a duna e hobennan conseho tocante posibilidadnan di trabou y estudio durante e encuentro Compas.
Prome a papia cu e hobennan y nan mayornan. Despues un tim multidisciplinario di cuido a drenta den combersacion cu esnan presente. E tim tabata presente pa ofrese yudansa y guia adecuá mesora na hobennan cu mester di sosten. En total, bintidos hoben a registra pa e trayecto aki. Durante e encuentro Compas, a colecta dato di e hobennan aki. Despues di e encuentro, lo discuti hunto cu e instancianan envolvi, e siguiente pasonan pa sostene e hobennan pa kibra patronchinan negativo y crea oportunidadnan nobo pa nan futuro.
Cu e maneho conhunto aki, Entidad Publico Bonaire, directorado Comunidad y Cuido, y e partnernan envolvi – FORMA, SGB, Akseso, Zorg en Veiligheidshuis, KPCN (polis di bario) y Voogdijraad – kier contribui na prevencion di violencia cu arma di candela bou di hoben y inverti den un futuro mas sigur pa Bonaire.
