Tourism Corporation Bonaire (TCB), den kolaborashon ku Florida-Caribbean Cruise Association (FCCA),ta hasi un yamada na tur alumno i skol na Boneiru pa entregá nan obra pa e ‘FCCA Essay & Poster Competition – Kompetensia di Relato i Poster di FCCA’ di aña 2025.
Esaki ta un oportunidat úniko pa alumnonan boneriano haña rekonosementu internashonal, ekspresá nan kreatividat i representá Boneiru huntu ku alumnonan di mesun edat for di henter region.
E partisipantenan ta kompetí kontra alumnonan for di área karibense, Mexico, Amérika Sentral i Suramérika, di manera ku esaki ta berdaderamente un evento internashonal i ta ofresé un plataforma pa mustra lo mihó di Boneiru su talento i ideanan.
Kategoria di kompetensia
E alumnonan por entregá nan obra den un di e siguiente kuater kategorianan:
Kategoria di relato i kategoria di poster pa ‘Junior Division’ (12 aña i mas yòn)
Kategoria di relato i kategoria di poster pa ‘Senior Division’ (13 pa 16 aña)
Tema di kompetensia
Tema pa e relato:
“Si mi tabata un pasahero krusero, kiko lo mi tin gana di mira òf hasi na mi isla?”
Tema pa e poster:
“Kon pa protehá e medio ambiente marino kontra aktividat riba tera”
E fecha mas tardá pa entregá e obranan ta 22 di òktober 2025. Mester entregá tur relato òf poster kompletá i formularionan ofisial promé ku e fecha akí na TCB.
Eksigensia pa loke ta trata idioma: Mester entregá tur obra na ingles.
E ganadónan por konta ku premionan fantástiko:
Junior Division (12 aña i mas yòn) i Senior Division (13 pa 16 aña) kada un:
Promé premio: Lèptòp + $ 3000
Di dos premio: Aparato ‘touchscreen’ + $ 1500
Di tres premio: Smartphone + $ 1000
Ta anunsiá e ganadónan dia 10 di desèmber 2025
Ta honra e obranan ganadó durante e konferensia internashonal prestigioso Seatrade 2026, kaminda tin entrega di premio na representantenan di e destinashonnan ganadó.
Kon pa partisipá:
Manda un email ofisial na marketing@bonaireisland.com pa konfirmá bo interes. E tim di TCB lo manda e formulario ofisial di registrashon pa bo.
TCB ta enkurashá tur dosente, tur skol i tur mayor pa inspirá i sostené e alumnonan ku nan partisipashon. E kompetensia regional akí ta un oportunidat balioso pa talentonan hóben pa representá Boneiru, laga skucha nan bos i kompetí ku algun di e alumnonan di mas kreativo.
No pèrdè e oportunidat akí pa bria riba un esenario internashonal!