ORANJESTAD,Aruba
Preserva y stimula arte y cultura na Aruba ta hopi importante pa e desaroyo di nos comunidad y e identidad di nos isla. Tanto Arte como cultura ta ofrece multiple oportunidadnan pa siña, pasa tempo, crecemento personal, entretenimiento y ta promove communicacion entre hende.
Nos comunidad ta hopi importante pa Cas di Cultura, y mientras nos ta buscando oportunidad pa renobacion, nos ta desea di involvi bo den e proceso di tumamento di decision. P’esey nos kier a invita bo pa participa na un encuesta nacional. E encuesta aki lo yuda nos haya un miho perspectiva di nos comunidad. Nos ta balora nos comunidad y nos bishitantenan y nos lo desea di compronde e motivacion pa bishita, of no bishita, Cas di Cultura. Hayando un miho perspectiva di nos comunidad y bishitantenan, lo yuda nos mehora Cas di Cultura, nos servicionan y e actividadnan cu nos ta proveé.
Na e momentonan aki publico su reaccion ta halto y nos ta gradici pa esaki. Sin embargo nos a nota cu mayoria di e participantenan ta hende muhe. Tambe nos a nota cu mayoria di e participantenan ta entre 20 y 60 aña di edad. Esey kiermen nos mester cambia nos strategia di enfoke pa asina nos por alcansa e generacion di mas edad. Pa motibo cu e lo por ta mas dificil pa alcansa e grupo di enfoke aki atraves di medionan social, nos lo kier a pidi e publico general pa ayudo.
Durante e sigiente oranan nos personal lo ta accesibel telefonicamente, pa yuda tur e personanan di edad (60+) cu e yenamento di e encuesta. Nos personal lo pasa door di e encuesta cu bo na telefon y nan lo yena bo contestanan manualmente, cu e maximo integridad. Por yama e numbernan 592-5317 entre 9am y 5pm of number 592-7597 entre 1pm y 3pm. Si bo no tin Facebook bo por yama tambe pa yena e encuesta, sino por haya e link riba e Facebook page di Cas di Cultura.
Finalmente, tambe nos kier duna tur esnan cu a yena e encuesta un oportunidad pa gana premionan. Si bo ta interesa den e rifa aki, por fabor laga nos sa esey door di laga nos colega yena bo nomber, number di telefon, y bo email adres. E informacionan di contacto cu bo a provee nos cun’e lo wordo uza solamente en caso bo a gana un premio. Tur reaccion lo keda separa di bo informacionan di contacto. Cu mucho gusto nos lo desea di tende di bo!
