Den luna di òktober Sektor Famia & Hubentut di Ministerio di Desaroyo Sosial, Labor i Bienestar, bou di guia profeshonal di JCI IOBA a siña 21 hóben debatí, vosiferá, presentá i defendé nan opinion bon argumentá. Un hurado kalifiká a skohe for di e partisipantenan un grupo di 12 partisipante pa debatí kontra otro dia 20 i 21 di novèmber.
Dia 20 di novèmber (dia Internashonal di Derechi di Mucha) tabata tin un debate entre Kòrsou, Aruba i Boneiru ku a kai bou di e trayekto ku UNICEF, yamá: “Mijn Nieuwe Wereld”. E debate aki a tuma lugá virtual. Dia 21 di novèmber, 9 di e hóbennan a debatí durante un kòntèst di debate Nashonal den WTC.
Pa a yega na e tópikonan di debate a hiba diskushon den luna di ougùstùs ku algun grupo di hóben i a hasi un enkuesta tokante Bida bou di e viro di korona. E mésun enkuesta aki tur e paisnan di Reino a hasi entre nan hóbennan. A kompilá e resultadonan di e diskushon, e enkuesta i e puntonan di mas importante di e debate den un rapòrt ku tin e título #MIJN NIEUWE WERELD (MI MUNDU NOBO).
E hóbennan ku a gana e debate Nashonal awe a hasi entrega di e rapòrt na Minister Hensley Koeiman di Ministerio di Desaroyo Sosial, Labor i Bienestar komo e ministerio ku ta enkargá ku koordinashon di e tratado derechi di mucha. Tambe nan a entregá e rapòrt na sra. Anna Maria Pauletta, presidente di staten. E hóbennan tin e petishon pa duna splikashon di e rapòrt aki den staten i na ministernan di e otro ministerionan.
Sektor Famia i Hubentut ta stimulá nos hóbennan pa trese nan opinion dilanti i ta pidi gobièrnu den su totalidat pa tene kuenta ku artíkulo 12 di e tratado kual ta bisa ku mucha tin derechi di duna nan opinion i ku Gobièrnu mester puntra i skucha nan opinion. Enbolbimentu di hóben ta kontribuí na outoestima i sentido di bienestar bou di nos hóbennan.
Durante e último konferensia virtual di e Taskforce Derechi di Mucha di Reino dia 24 i 25 di novèmber último, Profèsor Micha de Winter i profèsor Ton Liefaard a bolbe mustra riba e importansia pa traha ku e mucha mes i pa fortalesé partisipashon i enbolbimentu di hóben di tur nivel den tur aria di maneho.
![Entrega Di Rapòrt Mijn Nieuwe Wereld (Mi Mundu Nobo) 153 129265024 2690568791196319 1070262592142542979 O](https://www.eanews.com/wp-content/uploads/2020/12/129265024_2690568791196319_1070262592142542979_o.jpg)
![Entrega Di Rapòrt Mijn Nieuwe Wereld (Mi Mundu Nobo) 154 129450685 2690568787862986 7436139560836125220 O](https://www.eanews.com/wp-content/uploads/2020/12/129450685_2690568787862986_7436139560836125220_o.jpg)
![Entrega Di Rapòrt Mijn Nieuwe Wereld (Mi Mundu Nobo) 155 129757222 2690568797862985 9214004723084485228 O](https://www.eanews.com/wp-content/uploads/2020/12/129757222_2690568797862985_9214004723084485228_o.jpg)