Diamars dia 21 di november 2023 a tuma luga na Renaissance Convention Center e prome Communty Building Event “Let’s Connect! – Ban Conecta!” organisa pa CEDE ARUBA den cuadro di proyecto BARiO UNICO.
E evento a tuma lugar den un ambiente vibrante, yena cu speransa y energia positivo pa cu e deseo-, idea- y cambionan cu ta desea di mira den e barionan y comunidad di Aruba.. Un evento sumamente exitoso, caminda e Centronan di Bario cu ta forma parti di e proyecto BARiO UNICO no solamente a topa 32 diferente otro organisacionan den comunidad di Aruba, pero alabes a haya e oportunidad pa conecta cu nan. A intercambia idea, a inspira y a sostene otro. Ya caba diferente di nan a forma un base y a traha planes di colaboracion na beneficio di comunidad di Aruba.
Por a conta tambe cu presencia di Sr. Rocco Tjon, Minister di Husticia y Asuntonan Social, Sr. Endy Croes, Minister di Ensenañsa y Deporte y Sr. Ursell Arends, Minister di Transporte, Integridad, Naturalesa y Asunto di Adulto Mayor.
E anochi a cuminsa cu palabranan di bonbini y discurso di parti di Director di CEDE ARUBA, Sr. Daniel Tecklenborg, sigui pa un discurso di parti di Minister Rocco Tjon. A hiba palabra tambe e Programma Coordinator pa BARiO UNICO, esta Sra. Gianni Bermudez.
Durante e anochi aki a haci entrega di reconocimento na cinco baluarte como aprecio y gradicimento pa tur e añanan di dedicacion y servicio comunitario na e Centronan di Bario en particular, pero alabes na comunidad di Aruba den General. Nan ta:
Di Centro di Bario Lago Heights
Sr. Kenneth C. Lucas
Sr. Valentino W. Peterson
Sr. Rufo J. Anthony
Di Centro di Bario Playa Pabao
Sr. Dennis K. Burke
Di Centro di Bario Noord
Sra. Marlin Ignacio
Tur presente a haya alabes un un preview di e website nobo di BARiO UNICO. Un website diseña pa JDB. E website nobo aki ta brinda un potencial enorme pa cu BARiO UNICO, caminda cada Centro di Bario cu ta forma parti di e proyecto tambe lo tin e oportunidad unico pa nan mes por maneha nan informacion, por ehempel encuanto nan actividades, eventonan y espacionan cu nan tin pa huur. Por haci Project Management, e-Commerce, por haci uzo di dato pa por maneha y mehora servicio, na cliente existente y alabes con por atrae clientenan nobo. Keda pendiente pa mas informacion encuanto e dia cu e website aki lo bay live.
E obhetivo di e Community Building Event ta pa crea y cultiva relacionnan profesional y di largo plaso. E ta pa establece y fortifica relacionannan cu ta beneficioso pa tur stakeholders y pa comunidad di Aruba. “Let’s Connect! – Ban Conecta!” ta ofrece un plataforma unda ideanan fantastico ta topa oportunidad. Tur e ideanan aki hunto, cu alabes ta conta cu apoyo y sosten di un network, ja caba ta un stap den bon direccion pa logra e cambionan cu nos tur ta desea den e diferente barionan. Laga nos tur hunto haci esaki bira un realidad. Let’s make this happen!
E siguiente Community Building Events di “Let’s Connect! – Ban Conecta!’ lo tuma luga den bario na e diferente Centronan di Bario. Lo duna mas informacion via di e website nobo.
BARiO UNICO ta un colaboracion entre Gobierno di Aruba, CEDE ARUBA y Centronan di Bario. E programa tambe tin sosten di Samenwerkende fondsen Cariben y tin colaboracion caba cu diferente organisacion den comunidad.
Gradicimento ta bay na tur cu a participa cu e evento aki y na tur cu a haci e evento aki posibel.
Pa mas informacion por tuma contact cu CEDE ARUBA / BARiO UNICO via email barionanunico@cedearuba.org of via number di telefon 582 7666.