DEN HAAG, Hulanda
Den sala central di ‘Stadhuis’ na Deventer, di 9 di maart te cu 19 di mei 2020, lo por mira un exposicion especial di Gustave Nouel (GN) di 20 pintura y algun objeto. E exposicion titula ‘Caranan di Oranje’ ta referi na pinturanan cu ta refleha caranan relaciona cu identidat comun di nos Reino soberano. Cu e exposicion aki e pintor di Caribe GN (www.gustavenouel.com / www.gustavenouel.exto.nl ) kier subraya cu henter Reino tin unicamente un ‘Oranjehuis’, aunke e ta consisti di cuater diferente ‘Pais’.
Exposicion ‘Caranan di Oranje’ lo ta habri pa tur hende durante oranan di trabou.
Lo tin diferente actividad y sorpresa, durante y despues di Dia de Rey, relaciona cu e exposicion aki pa refleha e function puente di nos Casa Real…
Deventer ta e ciudad caminda e artista Caribeño GN a biba y traha como artista profesional, mayor parti di su bida. Actualmente GN ta guiando artistanan pintor di Deventer di tur nivel na asociacion di artista DAK. Tambe e ta dunando cursonan special pa pinta portret, tanto na DAK como na Kunstcircuit, un di e centronan cultural, di mas grandi y completo di region y posiblemente di Hulanda. (mira: https://www.kunstcircuit.nl/amateurkunst/zoek-cursus/aanbod/portrettekenen-en-schilderen/ ) Den su atelier na Deventer GN ta duna ‘masterclass’ tambe na artista diplomá y/o hopi avansa for di henter Hulanda.
GN tabatin mas di 200 expositcon rond mundo. Den PALET, e revista di Arte mas grandi di Hulanda, su cursonan di pinta y proyectonan artistico a ser publica. Hunto cu PALET ela organisa diferente viaje di Arte, caminda artistanan di Hulanda, Belgica y Alemania a participa na workshops cu e tabata duna, hunto cu e artistanan local conosi, Edmond Tujeehut y Elvis Tromp.
Na Hulanda, demasiado hende, sa poco o nada di e parti di Reino Caribeño, di nan talento y cultura. Pa e motibo aki GN di Aruba ta pensa cu intercambio cultural – cu igualdad di condicion – por añadi un balor na nos Reino.
Centro Cultural Kunstcircuit, na 2020 kier cuminsa un intercambio cultural cu National Institute of Arts (NIA) na Sint Maarten. Si esaki bira un exito, na 2021 un intercambio cultural structural lo por cuminsa tambe cu otro institutonan cultural di e otro partinan di nos Reino, caminda por incluí tur disciplina di arte relevante.
