ORANJESTAD,Aruba
Pa conmemora e lucha pa igualdad di genero, especialmente di e ser femenino, Arubus NV a
organisa un charla pa su empleadanan. A trece hunto e personal femenino cu ta labora tanto
na Arubus, pero tambe na Aruparking y Arutram, pa asina comparti un rato ameno, den
colegialidad y semper recordando e esencia, lucha y perseverancia di e hende muher den nos
bida.
E atardi a cuminsa cu un charla duna pa sra. Nadine Antersijn di Momax Trainings & More,
kende a enfoca riba e lucha cu e ser femenino a hiba durante decadanan pa haya un trato igual
den comunidad, y con awendia nos por ta testigo di evolucion personal y profesional di e
hende muher den tur ambito. Nadine ta un profesional y entrepeneur, cu tin un famia pa
atende, y asina mes e ta mantene su negoshi y ta consciente cu su bienestar personal mester
keda un prioridad.
Tambe a conta cu presencia di sra. Desline Loefstok, cariñosamente conoci como Dess,
kende ta un Make Up & Tattoo Artist profesional, cu na su 29 aña di edad ta doño di su
mesun negoshi y na mes momento tin su casa y ta mama di 2 yiu muher. Dess a comparti su
mesun storia como hende muher, pero tambe a duna guia di con e ser femenino mester duna
tempo na su mes tur dia pa por mantene su mes como e pilar principal di su hogar.
Tabata un atardi sumamente ameno caminda e damanan di Arubus, Aruparking y Arutram a
keda satisfecho di por a experiencia y comparti empoderamiento hunto.
