BonaireFeaturedInternacional

Falta di klaridat pa maneho di laboratorio di Boneiru dor di Entidat Públiko

Bonlab
Un biaha mas  trahadónan di Bonlab, responsabel pa na un banda un bon funshonamentu di e Bonlab, pero alabes responsabel pa tin un garantia di trabou pa kuida nos mes i nos famia a keda informá ku entrante 2022 ZVK no kier kontinuá ku kumpra i paga servisio di su aseguradonan na Bonlab. Dos motibu a keda duná esta
1. Bonlab no tin akreditashon.
2. Un rapàrt di Robert Wever di aña 2018.
E informashon aki a kai komo un baño di awa friu serka tur empleadonan, ya ku e la bin netamente na momento ku nos ta prepará pa huntu ku nos sindikato kuminsá ku negosashon nan pa un CAO nobo.
E motibu duná pa ZVK a asombrá nos, ya ku nos sa ku entre Bonlab i ZVK tin un konvenio ku pa 2022 Bonlab lo ta akreditá. Aki nos ta spera ku Konseho Insular lo por pidi i haña e konvenio aki ku a keda firmá 1 di aprel 2021 i asina boso mes konstatá ku e motibu ei no ta bálido. Bonlab a invertí un montante supstansial pa logra ku pa 2022 e laboratorio ta akreditá.
Pa loke ta e rapàrt di e tal Robert Wever, fuera ku nos tin nos propio pensamentunan pa loke ta e funshon, kual gustosamente nos lo kier elaborá mas amplio riba dje ku Konseho Insular, nos ta kuestioná e imparsialidat di e rapàrt-
Manera boso sa Bonlab ta un poli klínika ku ta duna servisio na e ” eerste lijnzorg” i ademas ta responsabel pa tareanan di Entidat Públiko Boneiru pa loke ta trata salubridat públiko. Ya pa basta tempu kaba e práktika ta ku Bonlab i e laboratorio di Fundashon Mariadal no ta kompetí ku otro, sino mas bien ta komplementá otro den e trabounan i por bisa ku esaki ta kana positivamente. Na nos pareser ku kresementu di e poblashon di Boneiru tin tur motibu hustifiká pa tin tantu un poli klínika i un klínika operashonal riba nos teritorio. Ademas e ta duna e kliente e oportunidat pa skohe kua servisio e ta deseá pa hasi investigashonnan riba nivel di laboratorio. Den un komunidat kaminda ta hiba e maneho di establesimentu i merkado liber, no tin espasio na nos pareser pa duna un entidat so e monopolio aki. E no ta saludabel tampoko. Esaki opviamente ta un eskoho polítiko di un maneho ku Entidat Públiko tin ku tuma. Riba esaki nos komo trahadó ta deseá klaridat, ya ku kada aña di nobo nos ta keda konfrontá ku e inseguridat pa ku kontinuashon di operashon di Bonlab i kuné inseguridat pa loke ta nos futuro komo trahadó, ku tambe tin derecho di por tin un garantia riba trabou i asina plania nos bida.
Ku asombro nos a tuma nota ku Entidat Públiko, kende ta e akshonista mayó di BIA pero alabes akshonista mayó di Bonaire Holding Maatshappij (kende riba su turno ta akshonista di Bon Lab) no a pensa pa duna e operashon di têstmentu di Covid na aeropuerto, esta tantu e antigeentest komo e PCR, na Bonlab, siendo ku Bonlab tin e kapasidat pa hasi esaki. Ku esaki Entidat Públiko a kita un fuente supstansial di entrada pa Bonlab. Un entrada ku Bonlab sigur por a usa, mirando e situashon finansiero ku Bonlab a bin hañ’é aden komo konsekuensha di mal maneho di e anterior gerente. Un situashon finansiero ku pa loke ta nos komo trahadó a kondusí ku Bonlab te ainda no por kumpli ku parti di nos kondishonnan laboral, ankrá den nos CAO ya pa dos (2) aña kaba.
Manera nos ta deskribiendo aki, nos ta konkluí ku un biaha mas ta nos komo trahadó ta bira víktima di un banda, mal maneho di e instituto i di e otro un banda di falta di klaridat pa maneho di laboratorio riba nos isla dor di Entidat Públiko.
ZJCN (ZVK), ku ta e kompania di seguro pa ministerio ku ta manehá fondo nan di nos tur komo pagadó di prima di malesa ta ehersé un poder inadekuá pa stàp ku kumpra servisio serka Bonlab i asina usa e táktika di bludu e kompania.
Ta usa argumentu no bálido aktualmente (falta di akreditashon), miéntras ku a palabrá ku Bonlab mester perkurá ku pa aña 2022 e ta akreditá, algu ku seguramente lo ta e kaso. Ta usa rapàrt ku ta lanta duda pa ku su imparsialidat, mirando e interesnan komersial ku e trahadó di rapàrt mes ta representá.
Nos ta spera ku Konseho Insular di nos banda a haña un bista di e loke ta sosodiendo i ku ta hustifiká pa bin un klaridat di maneho di laboratorio riba nos isla, despues ku a hiba un lucha tenas pa a desentralisá laboratorio i hasié un tarea di Boneiru den tempu di Antia.
Ta e lucha pa a los for di ADC i kuminsá ku e operashon bou di responsabilidat di Boneiru mes. Nos tin pleno konfiansa ku Konseho Insular tambe lo por mira e nesesidat pa tene poli klínika i klínika separá i ku tin tur espasio pa nan eksistí separá banda di otro komplementando otro i asina duna e mihó kalidat di servisio di laboratorio riba nos isla.
Nos ta terminá, yamando danki pa a lesa nos relato, i si ta deseabel semper dispuesto pa den un “setting” personal aklará e puntonan aki i mas.

Related posts

Aumento di tarifa di awa entrante 1 di augustus 2022

EA News Author

Tur cos ta cla pa Port City bay destaho publico

EA News Author

Participa na job fair di Food & Beverage Association ta un oportunidad pa haya trabao

EA News Author

Leave a Comment

Whatsapp Message