Minister Ursell Arends: nan servicio ta valioso pa adultonan mayor
Minister di Asuntonan di Adulto Mayor, Sr. Ursell Arends recientemente a reuni cu representantenan di POH (Praktijkondersteuning voor huisartsen). E trabou importante cu e profesionalnan di POH ta brinda na comunidad ta pa provee cuido y guia pa salud, cu enfoke riba prevencion di malesanan cronico.
E trabou aki ta particularmente valioso pa adultonan mayor. Un gran parti di clientenan di POH ta adulto mayor, y cu nan cuido y guia atentivo, por sigura di por tene personanan aki activo pa mas largo den nan propio cas. E colaboracion cu otro instancianan ta keda importante den realisa e meta aki. Segun Minister Arends, lo sigui enfoca riba mobilidad y “active aging”.
Minister Arends kier manda palabra di felicitacion pa cumplimento di nan 10 aña di existencia, y un danki na tur esnan cu ta yuda haci un diferencia den e bida di nos cuidadanonan. Tambe a segura e representantenan cu di parti di ministerio di asuntonan di adulto mayor, cu lo sigui enfoca riba e meta di tene nos adultonan mayor activo fisicamente – y socialmente – mas largo posibel.