Ultimo simannan, orguyoso Filomena College MAVO na San Nicolas a sinti di su alumno atletanan. Cu orguyo nos por bisa cu nos scol tin alumnonan cu aparte di ta studiantenan ehemplar, tambe ta score den varios deporte nacional.
Pa e deporte di baseball e alumnonan Juan Ramada, Zyrick Laclè, Antoine Piña, Marc Rasmijn y Tyrone Punselie a saca cara di nan team y di nan scol Filomena College MAVO.
Pa e deporte di Boxeo na YMCA San Nicolas, Tristan Romero a sa di gana e medaya di oro pa 2021.
Pa e deporte di natacion scol ta orguyoso di Jaydon Croes cu durante di e competencia di Aruba Dolphins Invitational 2021, a gana un total di 14 medaya. Tambe Jaydon a kibra e record Arubano di 200 meter fly. Esaki tawata pa 10 aña para.
Un mencion special tambe nos ta manda pa Alzachary Ras cu ta yiu homber di Heintje Ras cu ta actualmente ocupa cu su hazaña den e mina di fosfato. Alzachary a compaña su tata den e prome parti di su hazaña.
Cada maestro y directorado di Filomena College MAVO ta felicita e campeonnan di scol cu ta demostra cu nos scol ta scol di talento grandi den deporte.
