Movementu Kousa Promé a klousurá djaluna dia 17 di novèmber último e siklo di edukashon emansipatorio titulá “Geopolítika”.
E siklo aki ta organisá pa e ala di formashon emansipatorio di Movementu Kousa Promé “AKADEMIA POPULAR ERROL SCOOP”.
118 Persona a sigui e kurso aki durante 4 luna i 110 a risibí nan sertifikado.
E Siklo “Geopolitika” a konsistí di 12 lès di kada unu 2 ora i mei. Tabatin tambe un pènel ku diskushon tokante geo polítika.
Durante e siklo aki a trata diferente tema importante den e situashon aktual di geopolítika.
Algun di e temanan ku a trata ta:
Kiko ta geopolítika, Genosidio di Israel den Gaza, Fokonan di problema i hostilidat na mundu, E polítika di Donald Trump,
Afrika e kuna di humanidat, E polítika nobo di Ibrahim Traore na Burkina Faso, Blokeo i avershon kontra e régimen di Nicolaas Maduro, E bèrdat di e situashon aktual na Haiti, E poder mundial di China, Kiko ta BRICS i kon e ta desaroyando? Kòrsou no tin bos den geopolítika mundial.
Esaki tabata siklo number 15 di Akademia Popular Errol Scoop.
Den un anochi ameno ku un bunita presentashon kultural Akademia Popular Errol Scoop a klousurá e kurso ku hopi satisfakshon.
Siklo “Geopolítika” tabata un éksito rotundo. Den 2026 Kousa Promé lo sigui organisá eventonan den kuadro di formashon emansipatorio..
Formashon emansipatorio pa sigui konsientisá pueblo i yega na e yu di Kòrsou nobo.
Press release: Movementu Kousa Promé
