Presidente di San Nicolas Business Association (SNBA), Errol de Freitas, a expresa su frustracion profundo tocante e falta di comunicacion structural y coordinacion entre Gobierno y e organisacion comercial. Segun e gremio comercial, maske cu tin reunionnan andando, Gobierno ta keda sin entrega un vision concreto ni un plan di ehecucion real pa e region di San Nicolas.
De Freitas a duna di conoce cu tur cos ta wordo haci den secresia pa e pueblo di San Nicolas, mientras cu e SNBA a entrega Gobierno plannan completo y ideanan original. Sinembargo, e proceso ta keda pega sin ningun resultado tangibel.
“Nos a entrega Gobierno un vision completo,” De Freitas a duna di conoce, añadiendo cu minister- of personanan individual por trata di tuma iniciativa pa haci cosnan su mes manera, pero loke ta falta ta un proceso di ehecucion structural y un plan maestro bon pensa.
Falta di atencion real: Gobierno no ta duna San Nicolas e debido atencion, limitando su mes na actividadnan superficial of areglonan chikito na Bernardstraat en bes di trece un cambio structural.
Falta di conexion y continuidad: Maske tin ronda di minister y contacto cu algun funcionario, e continuidad ta kibra y e acuerdonan haci riba proyectonan pa San Nicolas ta keda atras den e burocracia.
Proyectonan den pipeline sin progreso: Ideanan y proyectonan original cu e gremio ta presenta no ta haya e siguimento ni e respet debido pa por yega na un ehecucion exitoso.
Ante e situacion aki, SNBA ta haci un yamada fuerte na Gobierno pa laga e palabranan bunita na banda y cumpli cu e acuerdonan y plan- y proyectonan cu ta den pipeline pa por trece e desaroyo economico necesario cu e region di San Nicolas ta merece.