Ami, Gregor Dijkhoff, como fundador di Fundacion Curso di Papiamento Dijkhoff (nomber
oficial: Stichting Dijkhoff Papiamento Cursussen) a contribui for di mi curason na e
renobacion di Cas di Cultura. E amor pa nos lenga materno mi a hereda di mi tata
Papiamentista y escritor Arubiano Mario Dijkhoff d.f.m. y mi ta orguyoso embahador di nos
idioma na Hulanda unda mi ta residencia.
Mi ta corda cu tempo mi tawata mucha, mi a bay un obra di teater di Compa Nanzi na Cas di
Cultura, anto e tawata impresionante, humoristico y na Papiamento! Nunca mas mi a lubida
e momento ey. Un otro momento special tawata ora cu ami mes y mas alumno di mi klas na
Mon Plaisir Basisschool a presenta un obra teatral riba podium di Cas di Cultura durante un
“Bonte Avond”. Pa mi tawata un experiencia exitante.
Na Cas di Cultura Papiamento ta haya espacio pa wordo scucha, celebra y transmiti na hoben
y grandi anto esey ta algo cu mi ta sostene cu hopi pasion. Mi ta kere cu conservacion di nos
idioma materno ta cuminsa den luganan asina – luganan cu ta inspira, uni y contribui na nos
consciencia cultural. Pa e motibo aki Fundacion Dijkhoff Papiamento Cursussen a contribui
1.000,- florin na e proyecto di renobacion di Cas di Cultura.
Mi kier anima tur hende pa tambe duna nan yudansa, mirando cu e renobacion di un edificio
manera Cas di Cultura ta rekeri un suma considerabel. Laga nos huntu inverti den un futuro
unda Papiamento ta sigui resona riba e podium nacional di Aruba.
Fundacion Curso di Papiamento Dijkhoff ta dispuesto pa colabora riba mas proyecto cu ta
promove Papiamento y cu kier hiba nos idioma padilanti. Por tuma contacto libremente via
www.dijkhoff-talen.nl
Social media: @dijkhofftalen y @papiamentodictionary.
