Fundacion Lanta Papiamento (FLP) den su afan pa promove Papiamento y su literatura, a lansa den luna di februari di e aña aki un buki masha interesante na Papiamento, adecuado pa hoben y adulto y sigur pa nos alumnonan di scol secundario.
Ta trata di Ata Compa Nanzi atrobe – cuenta picaro pa hoben y adulto, skirbi pa Yvette Ecury (dfm) y Andy Daal. E ta un buki pa lesa y pa scucha, como cu cada storia tin un codigo QR cu por activa pa scucha e storianan. Esaki ta posibel como cu e storianan ta den Coleccion Aruba: https://coleccion.aw.
Den e buki tin shete storia di Compa Nanzi y su amigonan. Tambe tin informacion tocante e storianan aki como nos herencia cultural. E lector ta haya informacion tambe tocante e autornan. Alabes tin un lista di publicacion di y tocante Compa Nanzi cu ta duna e posibilidad pa haci investigacion y desaroya proyecto tocante e storianan interesante aki.
FLP y UNOCA a invita e docentenan di Papiamento di nos scolnan secundario pa entrega nan un buki pa nan scol. E entrega a tuma luga diahuebs dia 3 di september na e edificio di UNOCA.
Tabata un encuentro masha ameno cu e docentenan. Nan a keda masha contento cu e buki aki cu ta un adkisicion valioso pa e materia di Papiamento.
FLP ta masha satisfecho y orguyoso cu por contribui na e manera aki na enseñansa di Papiamento y su literatura.
FLP por a produci e buki aki cu sosten financiero di UNOCA y Cultuurfonds Caribisch Gebied.