Diabierna 4 di april, Prome Minister Mike Eman, acompaña pa Minister di Relacionnan di Reino Gerlien Croes, a haci entrega oficial di e Plan di Gobernacion 2025-2028 na Presidente di Parlamento, Sr. Marlon Sneek. Esaki ta muestra importante di e transparencia y liderazgo cu cual kier hiba e futuro di Aruba.
Durante e entrega, Prome Minister Eman a enfatisa cu e programa di gobernacion a nace for di un cooperacion constructivo entre e dos partido den coalicion. E ta forma riba base di dialogo amplio cu sector publico, gremio y grupo social den comunidad. A scucha pueblo, a compromete cu nan preocupacionnan y a integra esaki den un plan cu ta realistico, ambicioso y cu direccion cla.
Minister Gerlien Croes a subraya e importancia structural y legal di e documento. E plan di gobernacion ta forma e base pa locual por spera di gobierno den e periodo 2025-2028. Transparencia y responsabilidad ta fundamental den un democracia saludabel, y cu e plan aki ta duna Parlamento e herment pa cumpli cu su rol pa controla Gobierno.
E plan detaya ta duna tur parlamentario, sin distincion, e posibilidad pa monitor, evalua y exigi Gobierno pa duna cuenta riba cada compromiso y meta cu e gobierno AVP/Futuro ta propone.
Presidente di Parlamento Marlon Sneek a expresa su aprecio pa e entrega di e Plan di Gobernacion. E Plan di Gobernacion ta un instrumento esencial. E ta duna claridad riba e direccion cu gobierno kier tuma, y lo yuda Parlamento den eherce su funcion miho. Esaki lo elimina e stigma cu Parlamento di Aruba ta simplemente un ‘stempel parlament’.
Na caminda pa progreso
Cu entrega di e Plan di Gobernacion, Gabinete AVP/Futuro ta confirma su compromiso pa traha pa pueblo Arubano cu claridad, cooperacion y integridad. E documento no ta simplemente un plan, sino un compromiso publico cu cada ciudadano di Aruba.
Di progreso economico, sostenibilidad, acceso na cuido y educacion, e acuerdo ta cubri e aspectonan clave cu ta esencial pa eleva nivel di bida riba nos isla.
