Pa e ocasion aki, Minister di Finansa, Asunto Economico y Cultura, Xiomara Maduro, a ricibi Gobernador Boekhoudt y su esposa na Plaza Libertador G.F. Betico Croes. Despues cu a hisa e bandera di Aruba, e coro di mucha di Scol Cacique Macuarima a canta e himno nacional, bou direccion musical di maestro Danny Koolman y cu traduccion den lenguahe di seña pa Stella Montsanto.
Prome Minister Wever-Croes a tene un discurso, sigui pa un oracion di pastor Andry Jose, pa Pais Aruba. Como ganado absoluto di ‘Poëta di Patria 2021’, Frenk Lorenzo-Croes seguidamente a presenta su poëma.
Dos ganado di e festival ‘Un Canto pa Aruba su Himno y Bandera’ a canta un cancion: John Maynard-Wever (categoria 7-9 aña, 2020) y Caylee Pietersz (categoria 10-12 aña, 2021). E coro di mucha di Scol Cacique Macuarima tambe a canta dos cancion: ‘Mi Aruba’ y ‘Lama’. Banda di esey, e hobennan di Club di Movimiento a duna un presentacion di baile. Clausurando e ceremonia, un bes mas e coro di alumnonan di Scol Cacique Macuarima a canta e himno di Aruba. Gobernador di Aruba, Su Excelencia Alfonso Boekhoudt y su esposa ta desea un y tur un Feliz Celebracion di 18 di maart.
