Mirando cu Aruba lo bay conmemora e di 40 aña di nos Status Aparte;
Aruba su libertador Gilberto François Betico Croes a nace y lanta na Santa Cruz 124. Un cas den curason di e bario di Santa Cruz. Den aña 2007, a pasa e cas aki pa gobierno pa asina traha eynan un museo cu lo ser yama Betico Croes. E tempo ey Gabinete Oduber 4 a cuminsa prepara e proyecto, pero ora a baha na aña 2009, e gobierno di Eman 1 y 2 no a haci nada mas pa e proyecto.
“Tempo cu nos a drenta den Gobierno na aña 2017, ainda nada a wordo haci, y nos a cuminsa atende cu e proyecto. Pero prome mester a crea espacio financiero. Durante gobernacion di Gabinete Wever-Croes I y II, gobierno a traha pa crea espacio financiero y durante Gabinete Wever-Croes II a encarga ex Minister Endy Croes pa lidera e proyecto bunita aki. E minister encarga hunto cu diferente departamentonan di gobierno y stakeholdersnan a prepara un bunita proyecto, tanto pa e museo Betico Croes den e cas aki, y pa un parti nobo banda di patras moderno. Esaki cu e meta pa atrae hobennan y turista pa bin siña mas di nos libertador y di su lucha pa Aruba su Status Aparte. Parti di e proyecto tambe ta pa crea un Plaza di multiple uzo den curason di Santa Cruz”, lider di fraccion di MEP y ex Minister President Evelyn Wever-Croes a indica.
Pa preparacion di e proyecto a aloca aña pasa 300 mil florin den e presupuesto. E resto di e fondo pa e proyecto aki mester bin di e un surplus, den e fondo di inversion, pa por finalisa e proyecto bunita aki.
“Mi tambe ta desea cu e proyecto aki lo a keda cla hopi tempo pasa caba, pero no por cambia e tempo cu a pasa. Den nos gobernacion, nos a haci tur lo posibel pa crea e espacio financiero, y pa cuminsa cu e proyecto. Ohala cu e gobierno actual continua cu e proyecto pa e por keda cla otro aña, cu lo ta e aña cu Aruba ta bay conmemora e di 40 aña di nos Status Aparte. Esaki sigur lo ta un regalo grandi y bunita pa comunidad completo”, Evelyn Wever-Croes a finalisa bisando.
