Siman cu a pasa a Ssli den prensa e reportahe di AIVD=Servicio secreto di Hulanda tocante, segun nan e menasanan na e integridad teritorial di Reino Hulandes. E reportahe a ser traha hunto cu e servicio di inteligencia militar y e coordinador nacional pa combati terorismo y pa siguridad di Reino Hulandes. Claramente e report aki a ser traha for di e Geo-politica di Nato. Pa es motibo, segun nan e mayor menasa ta bini for di Russia, China y Iran.
Un parti grandi di e reportahe ta mustra a riba menasanan potencial di e 3 paisnan aki.
Otro parti di e reportahe ta basa ariba e menasanan for di Venezuela.
Nan no ta kere den un conflicto militar cu Venezuela. Nan no ta kere cu e país ta bay sali pronto for di e situación difícil, cual a cuminsa na 2017 cu e crisis político y económico. Hopi bon nan ta splica cu e crisis ta mas grandi cu Venezuela, pasobra e ta cubri full e región Caribense, pues tambe e parti Caribense di e Reino Hulandes, Aruba, Boneiro y Corsow.
Pa e parti Caribensa atrobe ta mustra ariba e interesnan geo-politica di USA, unda Russia, China, Cuba y Iran por hunga un rol.
Loke e reportahe di AIVD no ta bisa.
Merca, cu Trump como Presidente, na 2017 a cuminsa cu un politica di sancionnan financiero y restrincionnan financiero contra PDVSA, cual ta e compañía estatal petrolera di Venezuela. Tambe después a impone medida pa banconan na Merca pa freeze tur e placanan di gobierno Venezolano y di companianan estatal, balora na hopi biyon di dólar. Tambe a sanciona tur sorto di transaccionnan di Venezuela, pues Venezuela no por haci ningún sorto di comercio cu USA. Despues Merca a tuma medida pa sanciona tur país y tur empresa na mundo cu ta haci comercio cu Venezuela.
Despues di e medidanan unilateral di USA, Merca a presiona su lacayonan den Union Europea y grupo de Lima pa haci mescos cu Merca. Tur esakinan a haci e situación mas pio na Venezuela. Defacto esey kier meen cu Venezuela no por haci ningún sorto di comercio cu ún país, ni compania na mundo.
Guaido creación di Merca.
No lubida cu na 2019 USA a crea e fenómeno nobo yama “e autoproclamado”. Juan Guaido, un político radical derechista cu ni e pueblo venezolano tabata conoce, den presencia di algun cien persona, ariba un plasa na Caracas, a autoproclamo su mes como Presidente di Venezuela.
Merca di biaha, como creador di e fenómeno aki, a reconoce Guaido como presidente di Venezuela y a pasa tur e biennan di Venezuela na Merca, entre nan Citgo cu su mas di 9.000 gasoline stations pa Guaido y su Gang. Citgo tabatin e deal pa habri e refinaderia na Aruba. Na mei 2019 e representantenan di CITGO a bisa nos prome ministro, cu Guaido y su grupo a “Wind Down” (draai bek) e deal di Citgo pa habri e refinaderia na Aruba. Aruba Lubida!!
Igualmente presidente di Colombia Duque a haci cu tur empresanan Venezolano na Colombia, dor di entreganan na Guaido y su hendenan. Tur e medidanan di Merca ta pa motibonan di interés económico di Merca, manera un ministro di e gabinete Trump a declara na 2019, “cu tur petroli den suelo di Venezuela, ta pertenece na Merca”.
Pa tur hende cu dos placa di sinti eseynan ta e motibonan of culpa di tur problemanan na nos país bisiña Venezuela.
Relatora o rapporteur special di ONU, Alena Douhan.
E siman cu a pasa 12 febr 2021, e rapporteur di ONU (Organización di Nacionnan Uni) pa cu Venezuela, sra Alena Douhan, via un comunicado ta informa cu e efecto devastador di e sancionnan impone ta multiplica su mes tambe dor di efectonan pafor di territorio Venezolano.
Dentro di Venezuela e sancionnan ta afecta e sector publico y priva, e ciudadanonan Venezolano, organisacionnan gubernamentalenan, habitantenan di otro paisnan na Venezuela y tambe hopi empresanan. Retironan masal y otro dañonan humanitario ta grandísimo. E sancionnan ta costoso, desastroso, ineficaz y ineficiente.
Según e rapporteur e sancionnan a hiba e situacionnan malo ya existente den un fase di calamidad, di miseria, provocando un crisis económico, humanitario y un desaroyo cu un efecto devastador pa henter e población. E medidanan tuma dor di Merca y Union Europeo a haci e situacionnan di calamidad pio. E entradanan di gobierno a baha cu como 99%, mandamento di placa di afor a baha. Mayoria di entrada di Venezuela tabata drenta dor di e industria petrolera, pero e blokeo y sancionnan a baha esaki te casi na cero.
Nos tur sa cu ta gracias na ayudo di Russia, China, Iran y Cuba, cual paisnan no ta reconoce ni respeta e posición di Merca cu su sancionnan y otro medidanan contra Venezuela.
Douhan a menciona cu e activonan di Venezuela congela na banconan Mericano, Ingles y Portugues ta representa mas di 6.000 miyonnan di dólar.
Ademas e impedimento pa importa alimento a hinca como 2,5 miyon di persona den un inseguridad alimentario severo. Hendenan envés di come 3 bes pa dia ta come solamente un bes, cu menos cantidad y cu menos calidad.
Un tragedia humano ta e hecho cu antes Citgo tabata paga e costo na hospitalnan den exterior, pa transplantenan di organo pa muchanan cu malesa severo, no ta sosode mas, pasobra Citgo no ta den man di Gobierno di Venezuela mas, pero awor e ta di Guaido y su grupo. Según e relatora=raporteur di ONU e sancionnan multilateral contra e comercio petrolero Venezolano, minería y otro sancionnan ta contra derechonan internacional.
E sancionnan y otro medidanan di Merca ta pa un ‘Regime Change”
E propósito di Merca pa hiba un campaña di máximo presión pa cambia e gobierno di Venezuela ta un intervención den asuntonan interno di Venezuela, pues ta un acto ilegal.
Merca ta reconoce cu sancionnan ta causando un impacto hopi dañino na e pueblo di Venezuela, pa nan“Regime Change” ta conta. E pueblo di Venezuela no tin ningún Balor.
E salario promedio a baha te na 3 pa 4 dólar pa luna y cual no ta yega pa e paquete alimentaria básico di un famia. E población ta depende di e CLAP (Conseho Locales de Abastimento y Produccion) y di subsidionan.
Consecuencia ta e migración y hopi violación di e derechonan económico. Aruba, Korsow, Boneiro y tur país na Latino-America ta sinti e problema di migración di Venezolanonan
Douhan ta insisti cerca e Gobierno di USA pa den termino corto termina e emergencianan relaciona cu Venezuela y lanta e sancionnan na tercera instancianan, desisti di impone sancionnan ariba diesel, cual ta importante den producción y repartición di Cuminda y hopi otro asunto mas.
Ademas e Relatora di ONU ta pidi e gobiernonan di Gran Bretania, di Portugal y di Estados Unidos pa los e activonan di Banco Central di Venezuela, pa e país por cumpra medicina, cuminda y otro productonan esencial pa garantisa y satisface e necesidadnan di e pueblo di Venezuela.
E sancionnan ta ilegal.
Douhan ta haci mención con e blokeo di e reservanan di Venezuela na Banco Central di Inglatera a impedi Venezuela di cumpra vacunanan pa enfrenta COVID-19.
Tambe e ta pidi Gobierno di Nicolas Maduro pa cumpli cu e programa di PNUD (Programa de las Naciones Unidad para el Desarrollo) pa negocia un acuerdo pa garantisa e distribucion di e biennan esencial sin distinción di edad, di sexo, di religión y di opinionnan político.
Douhan a bisa cu mas relatoranan lo bishita Venezuela y na September lo tin e discusión den e conseho di derechonan humano di ONU.
Na final Alena Douhan ta bisa cu medidanan unilateral ta ilegal. Nan lo ta legal si nan a ser autoriza pa e Conseho di Seguridad di Nacionnan Uni of como contramedida si un país no ta cumpli cu su obligacionnan como estado.
E ta pidi pa tur paisnan di mundo, pa observa e principionan y normanan di derecho internacional y ta recorda cu e preocupacionnan humanitaria semper mester tene cuenta cu respet mutuo, solidaridad, cooperación y e multilateralismo.
Aruba, Korsow y Boneiro tambe ta sufri di e sancionnan y boycott di Merca.
Biniendo bek Ariba e report di AIVD, cual ta bisa cu berdad e crisis Venezolano ta cubri e región Caribense completo, esta Aruba, Boneiro y Korsow.
E report no ta menciona e dolornan pa nos den Caribe, kendenan ta e habitantenan di Reino Hulandes den Caribe.
E deal Aruba-Citgo pa habri e refinaderia a wordo para dor di Guaido y Merca. PDVSA mester a será su refinaderia na Korsow. BOPEC na Boneiro di PDVSA tambe ta será.
Fruta y berdura barata y di bon bon calidad for di Venezuela ya no yega Aruba, ni Korsow, ni Boneiro, subiendo costo di bida pa e pueblonan di Caribe den Reino Hulandes.
Pues e pueblonan di Caribe di Reino Hulandes ta sufri bastante dolor dor di e sancionnan y boicott di Merca. Esaki mester ta tambe e mensahe cu e gobiernonan den Caribe, di Aruba y di Korsow mester manda pa Hulanda y pa Estados Unidos.
Posicion di parlamentarionan di partido Democraat na USA.
Siman pasa prome cu 12 februari, varios congresista di e partido Democratico na Merca a pidi presidente Biden pa lanta tur e sancionnan y boicot contra e país Venezolano.
Nan ta uza casi mesun asuntonan cu e rapporteur di ONU ta uza.
Nan ta pidi presidente Biden, un democraat, pa elimina e sancionnan y boicott, cualnan tabata forma parti de e política di Ex-presidente Trump, kende ta un republicano.
Nan ta bisa cu gobierno demócrata semper ta honra e derechonan internacional ora ta toca relación cu otro paisnan.
Pa e parlamentarionan, derechonan internacional mester ricibi tur balor y respet den e maneho di e presidente democrático Biden, pa e motibo aki e peticion na Biden pa bandona e política desastroso di e republicano Trump dor di cambia e maneho di gobierno Mericano relaciona cu Venezuela, pa laga Venezuela mes dicidi su destino.
