Responsabel cu Princes Amalia ta biba cera den Palacio lo wordo extradita pa Hulanda
Un razzia tira algun dia atras na Republica Dominicana a conduci na aresta na un grupo di ciudadanonan di nacionalidad Hulandes cu ta forma parti di un organisacion criminal. Hasta na e sede di Hard Rock Cafe na Republica Dominicano a tira un inval.
Tabata dialuna ultimo cu autoridadnan di e pais hunto cu polisnan internacional a detene na e pais ey e Curasoleñonan Urvin Laurence Wawoe, alias Nuto; Dennis Goedee y Terence Angelo Richard de Vries, acusado di narcotrafico, trafico di arma, asesinato y otro delitonan cometi na Hulanda. Loke ta resalta den e caso grandi aki ta nomber dos organisacion criminal temeroso cualnan ta Mocro Maffia y No Limit Soldier.
Segun publicacion di diferente medio di comunicacion Europeo, Mocro Mafia, Mocro Maffia o Mocro-oorlog. Mocro pasobra e tin su origen den gruponan magrebíes (specialmente di Maroco). Su specialidad: trafico di cocaina y droganan sintetico pa Hulanda y Belgica.
E grupo tambe ta dedica nan mes na comete atentado y asesinato, como tambe trafico di persona y arma di candela. Tambe contrabanda di sigaria y alcohol. E droga procedente di Latino America, specialmente di e cartelnan di Colombia, unda nan tin “un relacion previlegia”. Por corda cu un di su lidernan, Said Razzouki, a wordo aresta na Bogota.
E droga ta wordo importa regularmente via di hafnan di Amber, Rotterdam y Algecira cu ayudo di Polis, Duaneronan y politiconan corupto.
Segun historia, e grupo aki a cuminsa opera den añanan 80 y e operacionnan a crece cuminsa na aña 2000, ora cu e bandanan cu tabata funciona na Rotterdam a drenta den contacto cu cartelnan di cocaina di Iberoamerica.
Di acuerdo cu e medionan, e grupo lo por ta plama den varios pais, incluyendo Spaña. Pero tambe nan tin bon contacto na Africa, for di unda nan ta canalisa e trafico di hashis y nan derivadonan pa lama di parti nort.
E grupo aki a bira conoci na nivel internacional, dia 6 di juli di 2021, pa tiramento na Amsterdam riba e periodista investigativo Peter de Vries, un di e reporteronan mas famoso di Hulanda. E culpabelnan di e asesinato aki tabata e banda aki debi cu e homber a wordo denuncia mas cu un biaha pa su delitonan y rednan di influencia.
Pero tambe e grupo aki a menasa Prome Minister Mark Rutte y princes heredero Amalia, kende no por hiba un bida normal y practicamente ta biba cera den palacio di su mayornan.
No Limit Soldier
Aunke cu e nomber aki ta confundi cu esun di un grupo musical, e grupo aki di crimen organisa tin su origin na Corsou.
E banda aki ta wordo señala pa trafica, droga pa Hulanda, debi cu na e pais ey tin hopi Hulandes Caribense ta biba.
Segun datonan, nan ta coopera cu gangnan di Hulanda pa contrabanda di cocaina cu nan ta haya for di Colombia y Jamaica.
Tambe e grupo ta dedica na asesinato riba ordo (trabou di sicario), eliminando narcotraficantenan di Corsou na Hulanda riba ordo y a cambio di pago.
E tresnan deteni na Rep Dominicana tabata fugitivonan pidi pa extradicion debi nan vinculo cu Mocro Maffia y No Limit Soldier, cu acusacionnan pisa na Hulanda.
Goede ta forma parti di e poderoso structura criminal “La Mocro Mafia”, cu ta opera na Hulanda. E tabata den libertad condicional pa su vinculo na narcotrafico y labamento di placa pero asina mes e no a respeta su condicion y a logra importa mas di dos ton di cocaina na Hulanda.
