Den un suceso fatal cu a tuma luga den careda di marduga di diadomingo, un hoben di apenas 17 aña a perde su bida despues de a wordo alcansa pa impacto di bala riba un sitio di stacionamento na Palm Beach.
E incident criminal aki a reporta structuralmente den careda di 1:18 di marduga, ora cu Central di Polis a ricibi un notificacion di urgencia. Segun e prome informenan, un hende homber no tabata duna señal di bida riba e parkeerplaats di e establecimiento Fat Tuesday.
Mesora un unidad di Cuerpo Policial Aruba (KPA) hunto cu personal di ambulance a wordo despacha cu maxima urgencia pa e sitio. Na yegada di e paramediconan, a brinda e prome auxilio necesario, pero lamentabelmente e heridanan tabata di tal gravedad cu e victima no tabata reacciona mas y no por a haci nada pa salba su bida.
Pa e protocol oficial, un dokter forensico a presenta na e escena unda a constata morto di e persona.
E sitio di e suceso a wordo sera mesora pa asina permiti Departamento di Recherche y Polis Tecnico (BFTO) cuminsa cu e investigacion minucioso pa recopila evidencia y pistanan cu por aclaria e motibo y topa cu e autor(nan) di e crimen aki.
Den un update oficial duna pa Cuerpo Policial, a confirma cu famia di e fayecido a haci e identificacion oficial. Ta trata di e hoben:
Rayden K.A. Kock Naci na Aruba dia 3 di juli 2008 (17 aña di edad).
Pa e impacto emocional cu un tragedia asina ta trece cune, personal di Departamento di Slachtofferhulp tambe a presenta na e sitio pa brinda e sosten y guia necesario na e famia den e momentonan dificil aki.
Cuerpo Policial Aruba a expresa nan mas profundo palabra di condolencia y forza na e famia y sernan keri di e hoben Rayden.
Mientras cu e caso ta sigui bou de un investigacion profundo, autoridadnan ta haci un apelacion fuerte riba comunidad: si bo tabata testigo, bo tin video, of bo tin un informacion cu por yuda soluciona e caso aki, por fabor tuma contacto via e Tiplijn di Polis na 11141. Bo yamada ta keda totalmente anonimo.
